Connect with us

كلام خارج المقرر

الجهاز الفني للحنكشة والشقلبة يخسر من الزمالك

كتب:daraweesh

الله يرحمك يا كابتن محمد لطيف … حكمة قالها من زمان :  الكورة اجوال … وعلشان تكسب ماتش في الكاس .. جول زي عشرة وزي عشرين ….  وعلشان كده الزمالك لم يلعب اليوم وحتي الهدف جاء من ضربة جزاء بالدقيقة 20  ؟ من بعددها الزمالك بيلعب علي الاستحواذ وغلق المساحات امام الاسماعيلي ومع ذلك كان له هجمات خطرة جدا وتالق الحارس محمد فوزي وانقذ فرص تهديفية للزمالك واخطرها ضربة راس من الجزيري …وهو ما جعل مدرب الزمالك يلعب علي المضمون وهو الفوز واغلاق اي اختراق للاعبي الاسماعيلي ولذلك كانت تغييرات فييرا تتسم بالشكل الدفاعي 

لكن هناك فارق كبير بين مدرب زي فييرا لديه ادوات بالملعب وثقة فيهم وتحريك جيد ليهم .. والاسماعيلي وهو لا يلعب في الملعب !!!  اصرار حمزة علي حرق دم الفريق و الجماهير والاصرار علي لعب محمد الشامي الذي لم يهدف من شهرين تلاتة  … وخرج كل جماهير الاسماعيلي من هدموها وزود همومها … وكرهنا نشوف الكرة في رجله او راسه او بطنه او كرشه

 عارفين سبب فساد عبد الرحمن مجدي ايه .. هو الشامي … الشامي خلي عبد الرحمن مجدي يكره يلعب كره اصلا وبيقعد يتحنجل وضاعت منه الكرة 5 مرات اليوم وعندها لا تنظر الي مجدي ..بل انظر الي تمركز الشامي وقتها .. ستجد الشامي ماسك مدافع الزمالك !!!!!!!!!! 

 بلاش عبد الرحمن مجدي .. اذهب الي الدقيقة 77  والكادر كان فيه عصام صبحي ومحمد الشامي واقرب لاعب من الزمالك كان علي بعد 5 او 6 ياردة .. مش حاوصف اللعبة ساترك لحضرتك ايها القارئ العزيز تشاهد تلك اللقطة الفريدة العجيبة الغريبة …. و قدرات محمد الشامي التركيزية الفنية الرهيبة ….. طيب شوفت الحنكشة والشقلبة بتاعة الشامي بالدقيقة 54 والا لما لعب بالكعب ووقف الكرة داخل منطقة جزاء الزمالك بالدقيقة 17 .. يا سلام يا سلام يا سلام . حتي اللعبة الكويسة طلعت وحشة !!!! … والا بلاش اتكلم .. لا الشامي ياخد من حسناتي انا كمان 

 هناك السؤال .. لماذا يصر الكابتن حمزة الجمل علي حرق اعصابنا .. بمشاركة الشامي الذي يجعل الفريق ناقص مهاجم من 3 اشهر ….  طيب الشامي وحش وغير مركز وخارج الفورم ( اعتبرها كده ).. ما بتغيروش ليه يا عم حمزة .. و الله لا يمكن ان يكون لحمزة الجمل تاريخ تدريبي … وهو بالعقلية دي .. ومعاه الكابتن حمص وغيرهم … شوية شادر بطيخ . لا بيهشوا ولا ينشوا .. شفتم فيريرا واحاديثه واستشاره اللي معاه .. حمزة ما بيعرفشي ولا يثق في الجهاز الفني المعاون الا في سؤالهم . اعطوني زجاجة مياه  ..مثلا  

 الفرق بين فيريرا وحمزة الجمل ..الثقة ومعرفة هو عايز ايه…. افراد لاعبي فريق الزمالك فيهم مواهب رائعة مثل محمد عبد الغني وابن اسامة نبيه وابن فاروق جعفر وابن عبد الغني و غيرهم كتير..كلهم خارجين من الصاعدين .. لكن حمزة خايف من كل حاجة وخايف من كل حاجة وحتي انه يغير هدومه .. ويغسلها .. علشان مش لاقي حبل غسيل .. وعمل تغيير متقدم جدا اليوم .. غير خالد النبريصي في الدقيقة 80  .. بسم الله ما شاء الله .. تغيير فظيع وتغيير ملموس وتغيير هائل … فييرا ..لم يلاعب اليوم شيكابالا .. لانه عايز يعبر الماتش  1-0  زي 20- صفر 

 لكن الكابتن حمزة الجمل .. خسران واحد صفر ومن ضربة جزاء .. والزمالك متراجع للتغطية الدفاعية … وبيخسر كرات كتير من الوان تو .. وعمل اربع تغييرات حمزة الجمل بيغير لاعبين اتنين فقط .. العملية مش بالعدد – لكن بقراءة الملعب وعمل تغييرات تحرك الفريق بالمناطق التي يدرسها الجهاز الفني قبل المباراة واثناء المباراة .. لكن كما قلت هناك شادر بطيخ قاعد علي مقاعد البدلاء 

 عايزين مثال بسيط…حصل بالدقيقة  24 و 29   تسديدين للاسماعيلي من خارج منطقة الجزاء وكرة بالعارضة من الشامي د 24 و اروخ لمدبولي في العارضة د 29 … ركزوا كل الفرص دي .. محاولات غير جمل تكتيكية فيما عدا توغل بالدقيقة 73 وانقذها مدافع الزمالك التونسي  المثلوثي ببراعة … وهو يعني ان الجهاز الفني خارج الخدمة في قراءة المباراة وتحريك خطوط الفريق ولا يوجد تعليمات للاعب ما في الملعب ومنهم عبد الرحمن مجدي الذي فقد الكرة بالضغط من مدافع غير مرئ وقادم من خلفه .. والجهاز الفني ترك ذلك يحدث 5 مرات علي الاقل دون طلب او تعديل من الجهاز الفني 

 عايزين الخلاصة .. لو استمر الكابتن حمزة الجمل  لبداية الموسم القادم … لن يكمل مع الاسماعيلي ثلاث او اربع اسابيع علي بعض… وافتكروا ده كويس 

 وانتهي الكلام خارج المقرر  

Click to comment

Leave a Reply

لن يتم نشر عنوان بريدك الإلكتروني.

بقلم الدراويش