Connect with us

كلام خارج المقرر

الحناكيش و النهاشين و الهباشين و النتاشين و التعادل مع ايسترن

كتب:daraweesh

التعادل مع الفريق الاخير في جدول الدوري بهدف لكل فريق  و اداء الفريق و خاصة من د 25 ممن الشوط الاول حتي الدقيقة 94 من الشوط الثاني … ليس معناه  الا اننا ننظر الي يوم 30 اغسطس الجاري ..علشان نردم علي كل الحناكيش و النهاشين و الهباشين و الناتشين … كلهم ييروحوا مع السيفون…  و نبدأ بنظافة ..بعد ما عشش في النادي من يوم ما أعلن عن تعيين اللجنة المؤقتة في 30 اغسطس 2016 … و  اللي عشش هو اساس الفشل و النجاسة و العفانة و العطانة  بكل عناصر … الي يومنا هذا …. من يوم ما جاء الباشا ابن البيه  في اول سبتمبر 2016 .. الي تواجد سعادة المهندس ملك الهمبكة و الفزلكة حتي يومنا هذا 24 اغسطس 2922

 يعني 6 سنوات من  شغل الحناكيش و النهاشين و الهباشين و الناتشين … في نادي  فقير غلبان اغلب من الغلب  مش عارف ..يلاقيها منين و الا منين …. عايز النتيجة ايه … و ملعون ابو الفقر اللي خلانا في الوضع ده 

و مش ماتش التعادل مع فريق ليسترن كومباني اللي حيخلينا نقول كده .. لكن اصبح الفرجة علي الاسماعيلي .. انك تقعد ملزوق في الكنبة و تدور علي اي حاجة تنعكش فيها .. لكي تصرف شحنة الغضب فيك و تضيع تركيزك في اي حاجة شاي قهوة كركدية جنزبيل …. الفرجة علي الاسماعيلي اصلحت حالة نفسية مستعصية و حزينة 

و كمان مفيش جمهور في مباراة اليوم ضد ايسترن .. يعني الحاجة الحلوة اللي ممكن تتفرج عليها .. اصبحت غير موجودة .. بقرار و لا قرار فرعون مصر او هولاكو  او تيمور لنك المغول و الا كسري المجوسي و الا ابو لهب و لا ابو جهل كمان .. من رابطة اندية المحترفين احمد دياب باشا مصر ..بالعافية 

يعني حتي الجماهير اللي كنا نتمتع بيها بالموسم الحالي .. اتحرمنا منه .. لكي نتفرج علي الشامي جدو حولان  و مخلوف عقدها  و محمد  عادل رجعها لورا  و احمد دبولي مستر عطلة المعطلاتي و نجم السينما و الجمباز احمد مصطفي  .. مجموعة من الحنكايش .. تجعل من الصعب جدا جدا ان تتخيل ان اولئك اللاعبين يؤدون بفانلة القميص الاصفر الذهبي و خاصة ان تم تخصيص  الكابتن حمزة الجمل كمان .. زودها خل خالص 

 و بمناسبة  الكابتن المدير الفني الجهبوز حمزة الجمل … من يتابع الفيس بوك افندي … و يري بعض اراء التمجيد و الترفيع و الشكر و الثناء للكابتن حمزة الجمل  علي ما فعله … و كل الاراء لها احترامها … لكن كان ذلك – من المفترض ان يلقي المسئولية علي اكتاف  الجمل . لكي يطور من نفسه و يظبطها .. من اجل  ان يسعد من معجب بحمزة الجمل و يتمكني استمراره الي الموسم القادم … لكنت حمزة الجمل  بيجعل من يريد بقاءه بالموسم القادم .. يكره نفسه ان قال ذلك .. و كثير من دافعوا عن حمزة .. الان يهاجموه بضراوة …. و من الاخر كده .. مفيش الكلام ده السنة الجاية … فيه حمادة تاني خالص  … و كمان الجهاز الفني المعاون .. مش عارف مين وافق علي التشكيل الغريب اللي وضعه حمزة الجمل و ما هو الغرض وراء ذلك .. لا احد يدري

اما عن احداث الماتش نفسه … بعد هدف محمد الشامي  بالدقيقة 24 .. اختفي الاسماعيلي نهائيا بالرغم من الاستحواز التي قد يتعدي 60% لصالح الاسماعيلي و لكنه الاستحواز في احط انواع السلبية المنرفزة للمتفرج .. و بزعامة كما قلنا المعلم المعطلاتي و رجعها لورا و عقدها و ملك الجمباز … هدوء و استسلام و انبطاح للفريق الاصفر بلا معني …. الا قلة الحيلة و ضعف الامكانيات و وراءهم جهاز فني  لا وجود له علي الاطلاق 

و رغم ظهور الخطورة من الدقيقة 32 بشكل واضح و  احمد عادل ينقذ هدف اكيد .. يوضح ان الخطورة قادمة .. و محمد الدسوقي ينقذ هدف د 40 .. ظل الجهاز الفني النائم بجدارة خارج الخدمة و ربنا ستر  انتهي الشوط الاول بتقدم الاسماعيلي 1-0 .

و يدفع الجهاز الفني العبقري بخالد النبريصي د 46 بدلا من كارثة الزمان و المكان و السينما و الجمباز احمد مصطفي … كان الجزاء الفوري بدخول هدف التعادل  لايسترن كم كرة تكررت و ستكرر من ارتباك المدافع محمد نصر  لحداثة خبراته .. و الجهاز الفني من بنها 

و يستمر الاداء المهبب من الاسماعيلي بوجود 3 مدافعين لمدة 63 دقيقة و  بالرغم من نزول عبد الرحمن مجدي د 62  الذي يشتري  عشرة متر مربع  و يقف فيها عمدة و شيخ غفر … دون اي تعليق او توجيه من الجهاز الفني المغلوب علي امره .. و طوال الشوط الثاني … تنعدم خطورة الفريق الا من كرة واحدة من محمد عادل بالصدفة في القائم د 49 و تسديدة في البطاطا من احمد مدبولي د 71  .. غير كده لا شغل هجومي و لا تحضير و لا تحركات .. الا مجموعة من الحناكيش و النهاشين و الهباشين و الناتشين… و الدنيا هاصت و يخرج محمد نصر مصابا و ينزل عمر الوحش د 76 .. و تشهد الدقيقة 84 … اغرب تمريرة في تاريخ الاسماعيلي و الكرة المصرية من الكابتن محمد الشامي و هو في مركز الجناح  .. في يد حارس مرمي ايسترن كومباني 

و ربنا يسترها معانا في 180 دقيقة القادمين امام فريق انبي و امام فريق طلائع الجيش و خلونا نخلص من الموسم المهبب .. و  كل اللي فيه من كل العناصر اللي لا يمكن تصور وجودها في الاسماعيلي .. و الله حليم ستار و هو جابر المنكسرين و هو ارحم الراحمين 

 و انتهي الكلام خارج المقرر

Click to comment

Leave a Reply

لن يتم نشر عنوان بريدك الإلكتروني.

بقلم الدراويش