Connect with us

كلام خارج المقرر

الصباحي ظالم .. و الاسماعيلي يستحق الظلم و شايكو نجيب

قبل اي شئ انظروا الي الصورة المرفقة و قبل تسديد ضربة الفساد التي احتسبها الحكم الظالم  الصباحي علي الاسماعيلي  في اخر دقيقة  بالوقت بدل الضائع من المباراة 

 دققوا في وضعية الخمول للاعبي الاسماعيلي … و وضعية الاستعداد للاعبي النادي الاهلي … ستجدوا ان المحصلة لابد ان يسجل لاعب الاهلي احمد سيد غريب الهدف من الكرة المرتدة من الحارس المظلوم احمد عادل عبد المنعم 

ظهر لاعبي الاسماعيلي و كأنهم اول مرة في حياتهم .. يحتسب عليهم ضربة جزاء .. و وقفوا جامدين مجمدين مذهولين مزبهلين و لم يتوقعوا و لو بنسبة  واحد في المليون ان الكرة سترتد من حارس المرمي .. بينما لاعب الاهلي  في وسط الصورة كان يستعد لانطلاق سباق سبرنت 100 متر حواجز .. ليلحق بالكرة المرتدة من الحارس  و يسجل هدف التعادل … قبل نهاية المباراة و لاعبي الاهلي يحتفلوا بالتعادل بالعناق و القبلات 

May be an image of 4 people, people playing sport, people standing and stadium

انظروا الي يد الحارس و وضع جسم لاعب لاهلي .. تتحسب ازاي دي ضربة جزاء 

و انظروا الي مكان الحكم الصباحي … تتحسب ازاي .. حتي لو الفار قال ضربة جزاء- ده حتي لم يذهب لرؤية اللعبة علي الفيديو .. اصرار علي الفساد من مفسد  

فعلا لاعبي الاسماعيلي يستحقوا الظلم .. لانه ظلم نفسه قبل ان يظلمهم الحكم  محمد الصباحي تلميذ الشيخ طه اسماعيل  اللي كان في الاستوديو حيبيض … بيضه حمراء 

 مش مصدقين .. ارجعوا الي الدقيقة 43 من الشوط الاول .. و كرة مرتدة للاسماعيلي  و اربعة علي ثلاثة و تناقل الكرة الي داخل منطقة جزاء الاهلي لخلخلة و تشتيت حارس المرمي شوبير .. لتصل بالنهاية الي اللاعب سايكو .. و هو في وضع تسديد رائع و اتساق و توازن جسدي سليم و مع ذلك يلعبها اللاعب الايفواري او الناميبي مش عارف – سايكو –  الي خارج المرمي المفتوح تماما .. و كأنه النسخة النيجاتيف من اللاعب الفذ المغوار شكري نجيب .. و منها لله اللجان الالكترونية و اللي عملته و بتعمله في صفقات التعاقدات  الشتوية.. بقي عندنا  شايكو نجيب .. و الشين ورانا ورانا .. لحد ما تودينا في شتين داهية … شين شين 

برضه ارجعوا الي الدقيقة 52 و تمريرة  ساقطة خادعة من شايكو نجيب .. من منتصف الملعب – اي و الله من نص الملعب –  الي احمد عادل عبد المنعم .. و كأن شايكو نجيب .. عايز يجيب جول في الاسماعيلي .. من نص الملعب 

كمان ارجعوا الي الدقيقة 82 و خلبطة و شخبطة و جليطة من شايكو نجيب في الباك الايمن و صراخ و عويل من الحارس احمد عادل عبد المنعم و هي هي نفس اللخبطة و  التي اعطت الفرصة  للحكم  الصباحي ان يدبسنا في ضربة جزاء … و احنا فعلا نستحق الظلم .. ان لم نفرم الاهلي  و هما بيلعبوا بالصغار 

و بمناسبة الشين الحزينة .. اخونا محمد الشامي طيب الله ثراه .. مفسد مفسد فسادا و بيلعب حكشة و امتي يجيي اليوم و لا نراه في الاسماعيلي ..بالدقيقة 85  و انفراد خمسة علي ثلاثة … بيضيعها بكل اقتدار و هبل و كان ممكم يقضي و يخلص المباراة .. لكن الشين ورانا ورانا 

 و الحمد لله ان اسم اللاعب الواعد البوليفي كارميلو  … مكلكع و صعب و مفيش في اسمه – شين –  و علشان كده  سجل جول جميل  بالدقيقة 16 و كان مزعج… لدفاع الاهلي …  حتي خروجه بالدقيقة 78 .. لكن السؤال هو نزل وجيه عبد الحكيم ليه و مين و فين 

اخطاء اضاعة الفرص واضحة للجميع و بطلاها  هما الشامي و شايكو نجيب .. ومهما كان الاسماعيلي محتاج شغل كتير و الخروج من الحالة السيئة للفريق بالدوري .. سهل جدا ان خلصت النوايا و استكمال النواقص بالفريق و يا رب يكون اللاعب الارجنتيني هجام في منطقة الجزاء .. ما يكونشي فيه حرف شين 

فقط يا ريت الاخ المهندس الجليل يحيي الكومي  يبطل يرفع صوابعه و يعمل لنا علامة الفوز و النصر قبل مباريات الاهلي  و الزمالك  و بلاش حكاية المكافأت المضاعفة و الساذجة  و كلها عمليات شحن و تضخيم للموقف بلا داعي  و واضح جدا ان لاعبي الاسماعيلي مشحونين و متوترين  و كذلك الجماهير .. قبل مباراة في كاس الرابطة لن تقدم و لن تؤخر 

 يا عمنا الكومي .. احنا مش عايزين نغلب الاهلي في كاس الرابطة .. احن عايزين نغلب الشرقية للدخان في الدوري الممتاز.. مثلا  .. لانه اهم و لازم و حتمي .. علشان  نخرج من موقفنا في  جدول الدوري .. لسه موقفنا صعب و صعب جدا جدا .. بلاش افورة و منظرة في غيرمكانها و في غير  وقتها

 في النهاية لا يمكن الا نوجه التحية و التقدير للجماهير الرائعة .. و التي لا مثيل لها 

May be an image of 1 person, standing and crowd

و انتهي الكلام خارج المقرر  

 

3 تعليقات

3 Comments

  1. Ekram

    17 يناير، 2022 at 5:18 م

    علشان كده التفريط في مروان صحراوي ليظل باهر وهاشم اساسيين خطر لو حد انطرد او اصيب . مروان زيه زيهم بالظبط . هاشم الناهردة ببطئه في التشتيت تسبب في ضربة الجزاء الظالمة . وباهر ٣ من لاعبي الاهلي سبقوه في المتابعة علي كرة ضربة الجزاء بعد ما وقعت من احمد عادل عبد المنعم .
    باهر مهم خاصة ان سايكو طلع سايكو خالص

  2. ايمن الاسماعيلاوى

    17 يناير، 2022 at 6:53 م

    هابتدى الهدم
    شكرى نجيب بيلعب في الإسماعيلي 10 سنوات وسايكو تانى مباراه وهانبدا فى هدمه
    ماشي ماكانش فى يومه ولكن هذا ليس مبررا للتقريع والهجوم الحاد علية

  3. مدحت محمد محمود محرم

    18 يناير، 2022 at 3:44 م

    الشامي ضيع كل الهجمات وباهر كان حايسبب ركتة جزاء ولم ينحرك بسرعه مع ركلة الجزاء وعايزين صانع العاب وخط دفاع كامل

Leave a Reply

إلغاء الرد

لن يتم نشر عنوان بريدك الإلكتروني.

بقلم الدراويش