Connect with us

كلام خارج المقرر

العك هوه هوه هوه .. و الخيبة هيه هيه هيه ..  ودوني الورشة

في البداية كل سنة و الجميع بخير و سعادة بمناسبة عيد الفطر المبارك ,, و كان نفسنا نعيد و احنا فرحانين و لو نص فرحة .. لكن ينكد عليهم … لاعبين و جهاز فني …. و قبلهم …. كل مجلس الادارة نفر نفر .. و الله هما سبب البلاوي اللي فيها الفريق من الالف إلي الياء
بدون لف أو دوران … مجلس ادارة الهمبكة و السيد المهندس همبكة و نائبه المهندس همبكة و الاعضاء همبكة و همبكة و همبكة و همبكة …. استقيلوا و اعملوا حاجة صح في حياتكم الأليمة البائسة 
و من يوم ما دخل الهمابيك ..مجلس الادارة من اول نوفمبر 2021 … و الجماهير ايامها مطين و مطينة بطين
و لسه الايام الاسود من قعر الحلة .. لم تأتي بعد
لو كل همبوك … قعد مع نفسه لحظة واحدة … و بقي محترم و أمين .. مرة واحدة في حياته فقط
يخرج علي الفور و يقدم استقالته
ده لو كان عند واحد منهم … دم .. لكن انا عارف أن ده مش حيحصل
الهمابيك كاهم .. منتظرين خراب مالطة
منتظرين مظاهرات تخرج و شباب مخلص – يتقبض عليهم و الدنيا تولع
و برضه مش حيستقيلوا و لا واحد فيهم
ليه
لان اللون الاحمر مفيش .. مفيش غير جلد السلاحف سمج و تخين 
الكل منتظر مصلحة ورا مصلحة … و حتى لو النادي الاسماعيلي يهبط إلي المظاليم
حاقول لكم معلومة 100%
المهندس الهمبوك الاكبر … فكر بالفعل في تقديم الاستقالة قبل مباراة ايسترن كومباني
و قال لاحد اعضاءالمجلس .. انا بافكر استقيل لو اتغلبنا من ايسترن كومباني .. لأننا لو اتغلبنا .. يبقي فشت و ارحل احسن
المهم الفريق فاز علي ايسترن كومباني … و اتصل رئيس الهمابيك بكابتن الفريق و قال له : شكرا يا عمر يا وحش …. ألف ألف شكر
لكن لما الوحش بدأ يتكلم عن مستحقات اللاعبين … الهمبوك الكبير عمل نفسه من بنها
المهم
أن الفريق اتغلب 2-0 من انبي بعدها …. الهمبوك .. برضه عمل نفسه من بنها
عارفين ليه
فاكرين سنة 2007 … أما الهمبوك الكبير …. عمل فيها مصنع للملابس الجاهزة بالاسماعيلية علي مساحة 8000 متر و حيوفر فرص عمل لاولاد الاسماعيلية 1500 فرصة عمل
ساعتها المحافظ الهمام .. عين الهمبوك الكبير .. عضو في ادارة منطقة الاسماعيلية الحرة
الهمبوك .. لا عمل مصنع و لا دياوله .. و لكن سلك و نظم ..حاجات حلوة كتير
برضه دلوقتي
منتظر – تسليكة – كبيرة قوي قوي .. كبيرة قد الفيل
علشان كده … لما اتغلبنا من انبي .. عم نفسه من بتها … و لما اتغلبنا من طلائع الجيش .. حيعمل نفسه من بنها
و لو اتغلبنا من طوب الارض … حيعمل نفسه من بنها
لان التسليكة الكبيرة .. قد الفيل ابو زلومة … ده فكره وأمله هو .. لكن نأبه حيطلع علي شونة .. او طلع خلاص
اما اخواننا الهمبابيك الاخرين
يا حلاوتهم يا طعامتهم وهما مقطقطين وقاعدين في مقصورة استاد الاسماعيلية و الهزيمة من انبي … وهما مقطقطين في مقصور استاد الجيش
طز فش …. اصل الهمبوك .. قاعد و احنا كمان قاعدين
ويولع النادي والنتائج والهبوط و الكل كليلية
بس للامانة .. هناك واحد في مجلس الهمابيك …. كل شوية يقول : ودوني الورشة
و ندمان و زعلان علي مكاسب راحت منه بره المجلس و مش عارف يعملها جوه المجلس
علشان كده لسه قايل امبارح : ودوني الورشة
……………….
و من الاخر كده . انا كتبت تقرير قبل ماتش طلائع الجيش

لو هزمنا من طلائع الجيش او اي نتيجة..لابد من تغيير شامل و كلي

و مازلت عند رأيئ  ان من خرب الدنيا … لا يمكن ان يصلحها .. و كل القرارات من 1 نوفمبر الحزين ..  زي الزفت و عشوائية و عبيطة  اخر عبط

و كل يوم يتأكد لنا ان مجلس الهمبكة اخر همبكة و  لو حسيت 100 قرار للمجلس  الهمبوكي … مستحيل مستحيل مستحيل ..تلاقي قرار واحد صحيح

 من بداية حرب طلعت يوسف الي تعيين الكابتن حمد ابراهيم  و اللي معاه  كجهاز فني …كله مناخوليا و شخبطة و لخبطة و شحططة 

و كانك جبت طبلة .. و اعطيتها لواحدة هبلة 

هي كده بالظبط .. هبلة و مسكوها طبلة … و اخرتها اسود من قعر الحلة …. و همبكة من اول يوم و فلوس اتصرفت بالكوم  و ايفواري يا كومي و ابو خماسة يا كومي و كل اللي قالوا كده …. بيطالبوا بالبوليفي يا كومي … و كان البوليفي هو ماردونا زمانه و حيجيب التايهة و الغافلة و القايمة و النايمة

 بالحقيقة مفيش نفس الواحد يتكلم عن الماتش و الهزيمة  من طلائع الجيش و لا تكتيك او تغييرات او التشكيل من الاصل من الكابتن حمد ابراهيم .. اللي اثبت فعلا .. انه كما كان لاعب فهو مدرب …. بطيخ في بطيخ … و ملعون ابو الليي يزعلنا 

و اتصور ان اي واحد بيفهم 1%  ..لابد ان يحكم علي الجهاز بتشكيله الغير مفهوم انه جهاز فني بطيخي من المقام الاول  و ممكن فعلا مجلس الهمبكة يغيره دلوقتي  – محتمل جدا – و الا بعد كام ماتش ..من طريق .. بص العصفورة 

لكن الاكيد ان العك هوه هوه هوه .. و الخيبة هيه هيه هيه ..  و احرتها سودة مع  مجلس الهمبكة الحالي و الخالي من الدم 

و انتهي  الكلام خارج المقرر

و كل عام و الجميع بخير وسعادة … و سترك يا رب 

Click to comment

Leave a Reply

لن يتم نشر عنوان بريدك الإلكتروني.

بقلم الدراويش