Connect with us

كلام خارج المقرر

الكومي كحلها و الجمل عماها …و الفريق مش نافع

هو الفريق تعادل مع المقالون العرب .. او يمكن القول ان الفريق عاجز عن الفوز او التهديف و حالته مطينة بطين … طيب و الكومي ..ماله 

اقول لكم 

نرجع مع بعض الي تشكيل الفريق اللي لعب به الكابتن حمزة الجمل امام المقاولون العرب  و بالتغييرات كمان 

حراسة المرمي .. محمد فوزي

خط الدفاع .. محمد دسوقي – محمد هاشم – باهر المحمدي – عصام صبحي

خط الوسط .. محمد بيومي ( احمد مصطفغي 60) – محمد مخلوف ( عمر الوحش 74)  – محمد عادل – وجيه عبد الحكيم ( عبد الرحمن مجدي 46) – أحمد مدبولي

خط الهجوم .. محمد الشامي

الانذارات : باهر المحمدي 70 و محمد مخلوف 72

هل تجد من بينهم لاعب واحد او حتي نص لاعب من الــ 11  خازوق اللي تعاقد معاهم الكومي في يناير او الانتثالات الشتوية و صرف كما يقول 40 مليون جنيه و لا لاعب واحد يستحق ان يكون بديل حتي … و باع 3 لاعبين اساسيين بالفريق ….خرابة بمعني الكلمة 

 عرفت ليه ان الكومي ..كحلها 

 عارف ليه بقي  قلنا حمزة عماها ….  عمرك شفت لاعب في الاسماعيلي زي الكابتن وجيه عبد الحكيم من ايام احمد ابو زيادة و محمد مجدي و كينيث و كلاتشي و الاجاويد دي .. طيب بتلاعبه ليه يا عم حمزة اساسي و بتبدا بيه المباراة  .. ليه ليه ليه 

و احنا في عرض ام نقطة نهرب بيها من مراكز الهبوط …. طيب محمد بيومي .. لا بيعرف يستقبل و لا يباصي و لا حتي يعافر … و بيومي محتاج  فترة  لا تقل عن عشر سنوات لكي يملأ مكانه 

 بلاش بيومي .. بلاش  وجيه.. طيب ايه مخلوف ..وضعه ايه بالظبط….  و ليه هو كمان و بكام و اشمعني … مخلوف و بيومي و وجيه 

و ضيف عليهم الشامي …  طوال الشوط الاول استلموا الكرة و فقدوها بنسبة 78% .. رقم يهد اي فريق 

 حتي الفرصة الوحيدة – اي و الله الوحيدة في الشوط الاول .. بالدقيقة 13 .. كانت من المبدع احمد مدبولي و تمريره حرير في حرير الي وجيه عبد الحكيم و اضاعها بالقدم الشمال ..فرصة لا تضيع الا من مهاجم وضيع ضائع و مفقود  .. بس خلاص

مفيش غير من الدقيقة صفر الي الدقيقة 98 .. غير فرصة واحدة حقيقية في الدقيقة 13 و الباقي كله لعب هوبا ليصة حتي شوطة عبد الرحمن مجدي د 81 و شوطة احمد مصطفي د 82 

 

 

صحيح هي حاقة تحرق الدم زيادة في عدم احتساب ضربة الجزاء  من الحكم امين عمر … لكن سيبكم من حكاية ضربة الجزاء … كان ممكن تتحسب و تطلع بره او …. نفوز بيها … لكن لا يمكن ان تغير ان الكومي كحلها و حمزة عماها .. اي كانت النتيجة … بس نطمن ان الكومي قال انه حيختار بنفسه الصفقات في الصيف اللي جاي !!!

الفريق شكله مش نافع علي الاطلاق .. لان الجهاز الفني بقاله اسبوعين راحة و تدريبات و خناقات علي قالة  ايهاب جلال من تدريب المنتخب  و فانلة الفريق كوبا حلوة و الا وحشة و معسكر مغلق و مفيش اعلام و لا تصوير … هس بس ….  و في النهاية مفيش و لا جملة واحدة او تحفيظ ادوار و  لا اختراق من العمق و لا لعب علي الاجناب و لا اي حاجة .. تشعر الفريق بانه يلعب لعب حكشة فكشة .. فين الجهاز الفني  ؟؟ مفيش ..حتي د 87 .. الشامي يضيع فرصة لا تضيع من لاعب ناشئ في الحضانة  و قبلها محمد فوزي ينقذ  انفراد د 72  و بالشوط الاول كان ممكن المقاولون ينهيها بدري بدري بفرصتين د 2 و 3 ضربات ركنية – كل هذا تحت سمع و بصر الكابتن حمزة الجمل الذي لعب بثلاث ديفيندر ببداية المباراة و طرفين لا يعدوا خط النص ..يعني خمسة من الفريق دون تواجد في نصف ملعب الخصم .. و كمان الجمل مقعد  خارج الملعب 4 مهاجمين ..كان الاولي يلعب مهاجم بكثافة  و بعد كده املأ وسط الملعب كما تريد ,, لكن حتي مدرب المقاولون بيعير في الدقيقة 95  تغييرات هجومية  و نزل احمد علي و كان ممكن بجيب جول و يسرق الماتش … و اخونا حمزة .. عامل زي فيلم  خائفة من شئ ما 

بصراحة الجهاز الفني بقيادة الكابتن حمزة الجمل .. ليس هو الجهاز الذي يمكن ان  ينتشل الاسماعيلي من معجنة الطين  اللي وضعنا فيها مجلس الهمبكة و رئيس مجلس الهمبكة .. لان حمزة الجمل لو مش عارف يكسب المقاولون العرب  علي استاد الاسماعيلية و في وسط الجماهير دي  و يروح يجيب تشكيل زي الطين … و يبقي حيقدر يكسب مين … مفيش 

 طيب كلام نهائي .. اتعادلنا مع البنك الاهلي 2-2 و اتغلبنا من الزمالك 2-1 و اتعادلنا مع المقالون 0-0 …. هو حكاية الثلاث ماتشات…….  كانت مع الارجنتيني خوان براون  ..فقط .. ما تطبقوها مع عم حمزة .. و خاصة ان تشكيلاته الجهنمية كانت السبب في فقدان 7 نقاط من 9 نقاط 

و الا هو خيار و فاقوس 

و باختصار اخر .. الفريق لا يتحمل الكومي و حمزة معا .. هم دونت ميكس 

 ربنا يستر في ما هو قادم … و انا عارف القادم اصعب و اسوء 

 و انتهي الكلام خارج المقرر 

Click to comment

Leave a Reply

لن يتم نشر عنوان بريدك الإلكتروني.

بقلم الدراويش