Connect with us

كلام خارج المقرر

المشرحة لسه ناقصها قوتلا … و التدمير مستمر بنجاح عظيم

نجح البعض من جماهير الاسماعيلي ,,, اصحاب العقول المنتفخة و من فلاسفة الغبراء في فرض هيمنتهم علي النادي الاسماعيلي من خلال تواجد مجلس ادارة السيرك القومي في النادي .. و انتشرت عبارات : التعاقد مع فلان مطلب جماهيري و رحيل علان مطلب جماهيري و ابعاد فلان مطلب عصافيري … و كل ما واحد يحلم بحاجة .. المجلس بينفذها علشان خاطر عيون الجماهير و طلبا لرضاها
و خرج الينا احد الفقهاء يزف لنا بشري أن اجمل حاجة في المجلس الحالي هو انه بيسمع طلبات الجماهير و بينفذها علي طول
و ناقص يعمل قسم خاص لتوصيل طلبات الجماهير إلي المنازل بطريقة الدليفري
و اخونا رئيس المجلس المهندس قائم نائم علي الفيس بوك و الواتس اب و الانستجرام و الكلوب هاوس … و عدد من اعضاء المجلس … شغالين بوستات من نوعية كوت دي فوار .. الحمد لله و عملنا اللي علينا و الطفل و المدام بخير …!
و فيه مجموعة … لو رئيس النادي الحبيب … عطس … تلاقي تصفيق و تهليل و تكبير
الله الله الله .. احلي صوت عطسه سمعته يا رئيس ..ده مش الريس ..ده كروان و بلبل بيزقزق
و اقسم بالله … لاعلق صورتك يا ريس في غرفة نومي .. لو جبت فلان و علان و ترتان
و ……. و ……. و ……….. و امور لا تجري الا في السيرك و مسرح الست ام عزيزة اللذيذة
طيب ايه النتيجة .. يا حلويين يا طعمين
و قالوا هاتوا حمزة الجمل – لا محمد وهبة – لا حمد ابراهيم – لا عماد النحاس – لا ديسابر … و كلها افتكاسات وصل الحال إلي التفكير في حسام البدري
مفيش مشكلة انك تقول و تعيد و تزيد و المجال مفتوح و الجو بديع و قول كمان احلي مواضيع
بس هل تفتكروا أن دي طريقة الاصلاح
و حال الفريق مطين بطين و 3 نقاط من 9 مباريات
و الفريق مرشح للهبوط إلي دوري المظاليم
هل سكت …. الفلاسفة و الخبراء … لا
لسه الطلبات و الجماهير تتحكم و الافتكاسات تتقدم
لان المشرحة لسه ناقصها قوتلاء .. و التدمير مستمر بنجاح عظيم
و لان مجلس السيرك القومي …. شغال بطريقة … ماذا يطلب الجماهير
حيقعدوا مع بعض المقربين من الجماهير و خاصة مجموعة … المعلم فلان و اصحاب الحظوة بتوع التذاكر المجانية و التبرعات و دول شلة الزمان الحالي الاغبر
و يحققوا مطلب الجماهير
و لو ساءت الحالة و وصلت إلي غرفة الانعاش من تاني .. برضه نشوف الجماهير عايزه ايه
لكن الاستماع إلي الخبراء و المحترمين … حرام حرام حرام
لان السيد رئيس النادي .. اعلنها صريحة .. انا بافهم احسن من أي خبير
و طبعا بعض النحانيح المقربين … مش محتاجين توصية … اشتغلوا من بدري
و قالوها بمنتهي الوقاحة و الصراحة : اللي كان حيضيع فترة القيد يا ريس هما اللجان أو اللجنتان . لولا انك تدخلت في الوقت المناسب و جبت لنا : افضل صفقات في تاريخ النادي الاسماعيلي
اهي الصفقات يا عم فيلسوف الغبرة
ايه رائيك … كده حلو
طيب رئيس اللجنة الفنية .. استقال و رئيس النادي رافض استقالته
و طيب فين رئيس اللجنة الفنية .. اللي رفض رئيس النادي استقالته و قال كله كدب في كدب
مفيش رئيس لجنة فنية و حتى مساعده الكابتن محمود حسن ..ما حدش اتصل بيه يسأله انت فين يا حودة .. و الباقي … منتظرين التحرك لكن لا حد يسالهم و لا بياخد رائيهم من الاصل و مغضوب عليهم من المهندس من البداية
طيب
رئيس الاسماعيلي الهندسة … قال ايه
مستاء من الادارة الفنية لمباريات الدراويش تحت قيادة خوان براون
ماشي يا عم الحاج ..طيب حتعمل ايه
كمشجع للاسماعيلي فالمدير الفني يجب أن يرحل
و لكن كرجل مسئول تفكر في استمراره من اجل الاستقرار مع وضع بدائل حال رحيله
!!!!!!!!!!!
في رائي المدرب المصري الانسب في للاعبي الفريق و اتفق مع راي منح المدير الفني مباراتين كمهلة خاصة ..انني من انصار الاستقرار و أن المباريات السابقى كانت صعبة اماما فيوتشر و بيراميدز ..كل ده كلام المهندس الكومي
سلطة في سلطة في عك
طيب من امبارح
الاتصالات لم تنقطع مع حمد ابراهيم و عماد النحاس
و رئيس النادي بيقول انه لم يتصل بعماد النحاس
و كل عضو مجلس ادارة شغال لوحده اتصالات و فيه واحد بيفاصل في الراتب من اولها !!! و عايز يغير فقط مدرب حراس المرمي علشان حبيبه يرجع
طيب ايه مزايا عماد النحاس اللي ترك ناديه بعد فشله
طيب ايه مزايا حمد ابراهيم ..انه كسب مباريات مع الفريق و ايهاب جلال عيان بالكورونا
برضه سلطة في سلطة في عك
طيب الحل ايه
الحل بسيط جدا يا مهندس يحيي الكومي
انك تسلم النمر و تبتعد عن ملف الكرة و تجيب واحد بيفهم ..يدير الملف من الالف إلي الياء
زي ما حصل الموسم الماضي
ابراهيم عثمان اتجمد و جاء من يفهم و نجح بنسبة 100% في المهمة المطلوبة منه 100%
سيبكم من فلاسفة الغبراء و محبي شيكولاته الكومي و المعلم فلان و ترتان و وجوه لم تكن تظهر الا في الزمان الاغبر
الحل يا مهندس يحيي … هو اعطوا العيش لخبازه – حترتاح و تضمن النجاح
لكن ده مش حيحصل
و الكارثة قادمة و الكل حيطير غصب عن انفه … و رغم انف اللي بيطبلوا لهم علي الطبلة و المزمار – ليل نهار
و لكن المشكلة
أن الاسماعيلي الضحية
و ربنا يسترها معانا

و انتهي الكلام خارج المقرر 

1 Comment

1 Comment

  1. ايمن الاسماعيلاوى

    17 فبراير، 2022 at 4:52 م

    الكومى يسلم النمر
    انت بتحلم يادكتور
    الراجل حقق حلم عمره وأصبح رئيسا لثالث اكبر نادى فى مصر وهو مدمن الشو الاعلامى
    الكومى اسوأ من ابراهيم عثمان بمسافه كبيره مع اختلاف الطباع
    من الذى تعاقد مع كرامله البوليفى او دييحو الارجنتينى ليس إلا للشو الاعلامى فقط ودول لاعبين شبعانين كوره وفلوس يبقى هايبهدلوا نفسهم في الدورى المصرى ليه هم بيلعبوا على قد الفلوس
    الأفضل كان البحث عن المواهب فى أفريقيا لاعبون جعانين كوره وعايزين يشتهروا ويلعبوا فى أوروبا
    الكومى تعاقد مع مدرب مغمور لا يفهم الف باء اداره المباريات والدليل تمركز اللاعبين في الملعب وطالع بيفتخر بقوه الدفاع
    مدرب ماعندوش طموح

Leave a Reply

لن يتم نشر عنوان بريدك الإلكتروني.

بقلم الدراويش