Connect with us

كلام خارج المقرر

بيراميدز و الكومي حَشْ وسط الفريق من الشتا اللي فات

كتب:daraweesh

صراحة كان الله في عوني و عون جماهير الاسماعيلي و جعل الله تشجيع  هذا الفريق في ميزان حسناتنا جميعا و لا حول و لا قوة الا بالله العلي العظيم 

و قبل ما نتكلم عن اي حاجة تخص مباراة الاسسماعيلي و بيراميدز و التي انتهت 4-0 لصالح بيراميدز و كان ممكن تنتهي 5 او 6 صفر و كان ممكن تنتهي 3-0  لان بيراميدز و اليوناني تاكيس اتعاطف معانا و امتفوا 3-0 بالشوط الاول  .. . لكن اللاعب الموكوس محمود صابر البديل …. رزع محمد فوزي الجول الرابع … بالدقيقة 78 من الشوط الثاني 

قبل اي حاجة تعالوا نشوف تشكيل بيراميدز :  حراسة المرمى: أحمد الشناوي و خط الدفاع: أسامة جلال – علي جبر – أحمد توفيق – حسين السيد و خط الوسط: إبراهيم توريه – عبد الله السعيد – إسلام عيسى – وليد الكرتي – رمضان صبحي و خط الهجوم: فخر الدين بن يوسف.. و كمان بره احتياطي محمد صادق .. و سيبكم من احمد فتحي ..لانه كان خارج التشكيل 

 يعني تشكيلة من اللون الاحمر كلها من الاسماعيلي الي بيراميدز بعبع الدوري و المنافس و ضعف عدد نقاط الاسماعيلي و ضعف عدد الاهداف …. كل ده ليه … لاننا فعلا فريق الدراويش المنحوس ابن المنحوس بمجالس ادارات زفت و هباب .. لا بيعرفوا يحافظا علي لاعبين و لا لهم في التفاوض مع اللاعبين و كل همهم شغل الهمبطة و الدهلزة و الهنكرة .. عايز الدليل .. حاضر .. من عيوني 

تعالوا نشوف تشكيل الفريق الاصفر بمباراة اليوم : محمد فوزي و محمد دسوقي ،، باهر المحمدي ،، محمد نصر ، عصام صبحي و محمد بيومي ( محمد مخلوف  59) ،، حسن ياسين ( احمد مصطفي 36)  ،، عمر الوحش ( محمد عادل 81) و احمدبولي ،، الشامي ،، عبد الرحمن مجدي

 السؤال هو : من منهم من الصفقات الجديدة من  فترة القيد الشتوي اللي فات. مفيش طبعا غير حسن ياسين  اللي لعب و خالد النبريصي و محمد بن خماسة كانوا في الاحتياطي و لا لهم اي لزمة و لا حتي حسن ياسين .. مجرد كمالة عدد .. يعني مفيش دعم بالفريق خلال فترة القيد الشتوي اللي فات .. يعني ملك الهمبكة رئيس مجلس الهمبكة .. حش وسط الفريق من الشتا اللي فات و اوقف القيد من الشتا اللي فات .. جه حش وسطه مطرح ما هو قاعد .. هو و باقي مجلس الهمبكة في يوم واحد 

تعالوا  نكمل 

الغاني  سايكو مشي  مقبل شراء ابو بكر حمزة و مروان حمدي … البوليفي كارميللو طفش و الارجنتيني  دييجو  هرب .. حتي شادي دكرنس راح وادي دجلة …. بعد ما حلف انه يكشف حكاية ال 100 الف جنيه و اتفاق محل الموبيليا !!!!.. لكن سكتوه بعد ما هددوه   بالسلخ و يحطوا السيخ المحمي في صرصور ودنه .. و بيدوروا علي بيعه للايفواري يا كومي . و لو قدام غطا حلة بلاستيك من بتوع الكامبي …. للايفواري جون موريل .. و باقي الفريق منتظر الحرق و الطحن و السحق 

 يعني بالعربي كده .. الكومي اغلق باب القيد من الشتا اللي فات و لا جاب لاعب يمكن ان تقول عليه لاعب  و الكل كان بيهل و يهيص و يعمل مصالح و عمولات بلاوي سودة  ..  علشان كده الكومي ما اتخضش من قرار وقف القيد  بسبب عقوبة عدم سداد مستحقات  التونسي لاسعد الجزيري … يعني ايه الكومي قفلها قبل ما تتقفل 

 علشان كده .. نقدر نقول ان الكومي … قفل الباب الشتوي من بدري و نتمني ان لا يكون موجود في القيد الصيفي القادم  باذن الله تعالي و رحمته  بجماهير الاسماعيلي 

 تعالوا نرجع للماتش و نطبق حكاية القيد الشتوي  علي الماتش  … حتصدقوا ان الاسماعيلي كان له فرص تهديفية  اكثر من بيراميدز  د 16 و 31 و 52 و 54 و 71 و 84 … و لكن و لا كرة منهم تقدر تقول ان صاخبها كان ممكن يحرز هدف  الا تسديدة عبد الرحمن مجدي 31  و هي اروع ما في المباراة ..  اما باقي الدقائق .. تشليت و عبط و خرب و هبل .. لان دي اتمكانيات اللاعبين .. و بدل كما كان ملك الهمبكة يجيب 4 لاعبين .. علشان يراضي بعض اجماهير المنتفخة ذاتيا .. جاب شروة لاعبين .. و كلهم بلا امكانيات و لا عقل و لا مستقبل .. علشان كده فريق بيراميدز ضغط  الشوط الاول و استغل حالة الرعب من اللاعبين و احرز اهدافه  د 6 و 32 و 37 .. و ساب لنا الشوط الثاني  علشان عارف ان لعيبة الفريق عندهم حالة الاسبهلال و لين العظام 

 حتي الجهاز الفني – اصابه النهيل – لعب بطريقة و تشكيل لا يناسب ابدا قوة و امكانيات فريق بيراميدز .. فابقي علي الوحش  بناء علي طلب الجماهير و الافضل منه عماد حمدي و محمد عادل … و لعب بخط هجوم مضغوط بلا داعي بتواجد الشامي و عبد الرحمن مجدي بدون راس حربة صريح مثل النبريصي   و لو كان الجهاز الفني الزحمة من محمد حمص و احمد قناوي و ايمن كمال – سيبنا من حمزة – اتفرجوا علي طريقة لعب الفرق الاخري مثل : طلائع الجيش و فيوتشر – تعادل مع بيراميدز   و الاتحاد –  كسب بيراميددز – كان عرف الجهاز الفني انه سلم المباراة لليوناني تاكيس قبل ان تبدا  و لدرجة ان الاسماعيلي لم يمرر تمريرة واحدة سليمة  الي الامام الا في الدقيقة 18 من الشوط الاول   اول محاولة كانت لعبد الرحمن مجدي د 31.. يعني امكانيات لاعبي الاسماعيلي تحتاج مدرب عبقري خبير و عبقري قبل خبير و خبير قبل عبقري .. لكي يمر الموسم علي خير

 القصة تحتاج جهاز فني متكامل و متفاهم و  بيخاف علي الفريق و بعيدا عن النفسنة و المشاكل و البحث عن الحاحات الصغيرة التافهة .. لان القادم صعب و ربنا يسترها معانا فينا هو قادم 

 و يظل جمهور الاسماعيلي هي اجمل و اروع ما في المنظومة و هي الكيان الوحيد الذي يجعلنا في حالة من التفاؤل مهما كان الوضع صعب 

و انتهي كلام خارج المقرر 

Click to comment

Leave a Reply

لن يتم نشر عنوان بريدك الإلكتروني.

بقلم الدراويش