Connect with us

كلام خارج المقرر

خالد يا زين … يا خالد يا زين … اوعي تروح في الرجلين

الكل بيتكلم و يحلل .. و ده حقه و مفيش مشكلة …. حتى لو كانت تحليلات تودي الليمان .. و الكل بيتكلم بناءا علي امكانياته و قدراته و نظرته للامور
و من هنا لبكرة حتلاقي ألف لايف و لايف و ألف نيلةو نيلة
………………….
لكن مفيش حد سأل … هو فين نائب رئيس النادي المهندس خالد زين
………………..
المهندس خالد زين .. شخصية محترمة و حاول مرات عديدة بالتواجد .. و لو عضو في مجلس الادارة .. و لم يوفق لاسباب كتيرة
و لكن اخيرا بقي له دور في مجلس الادارة .. و مش أي دور .. ده نائب رئيس المجلس ..مرة واحدة و بدون مقدمات و باجماع و اكتساح
و نائب رئيس المجلس له من الصلاحيات ( بالقوانين و اللوائح) … صلاحيات قوية جدا جدا
طيب هو فين المهندس خالد زين …ناااااااائب رئيس المجلس
قاعد زي حالاتك و زي حالاتي … بيتفرج علي اللايف مع مظهر و بوكشا و غيرهم من المهتمين بشئون النادي
………………..
هو فين صحيح …نااااااائب رئيس النادي
لابد في الدرة … علشان الكومي يزهق و يمشي و يبقي رئيس النادي بالوكالة
لا … يا مهندس خالد زين و انا عارف انك لا يرضيك اللي بيحصل
استشير ناس محترمة و اجتمع معاهم
و لم الشمل …. و ده دورك و دي مهمتك و دي صلاحياتك باللوائح و القانون
و الا عايز تبقي خالد فرو ..التاني
و من فرو إلي زين.. يا قلبي لا تحزن
………………….
من بكرة يا كابتن خالد زين .. اللاعبين حيروحوا طابور .. يشتكوا النادي في اتحاد الكرة
و كمان بلاغات في النيابة بسبب رفض شيكات و قضايا نصب و هناك قضايا مرفوعة من التامينات و الضرائب و المياة و الكهرباء و اللي ما يشتري يتفرج … و القصة ستصل للانهيار الكامل
يا خالد زين …. الحالة طين و مطينة بطين
……………….
اخلع من اللي مورطينك في حكاية المتفرج و المتحدي و المتنمر و المترقب … لحد ما الكومي ..يجيب ضلفها و انت تبقي رئيس
ويقولوا الرئيس زين راح .. الرئيس زين جه
و سيبك من اللي بيستفادوا من جوه المجلس … جبهة بوشين و مع مين لمين
اخرج يا مهندس خالد زين ببيان و عمل ايجابي و اجتمع مع اللاعبين و الجهاز الفني و اعمل خطة للاستقرار و اتحرك منفردا و اعرف أنك ناااااااائب رئيس .. مش نايم رئيس … اجلس مع المحترمين الفاهمين
العملية مش مين يركن عربيته فين .. يا عم خالد زين
و انت الوحيد القادر علي اصلاح الامور
حاول يا يا خالد يا زين …. وان شاء الله توفق و سيب الباقي علي الله
لازم يكون لك دور و دور فعال
و الا عايز تبقي …. خالد فرو التاني … و اللي اتجمد بقرار غصب عنه .. لكن انت يا خالد زين مجمد نفسك بمزاجك و اختيارك و مختار احلي فريزر و قاعد مربع و مقرفص فيه
و خليك فعلا خالد زين اللي نعرفه … بدل ما تروح في الرجلين
………………..
اللهم بلغت ..اللهم فأشهد

 و أخر كلام 

كلام واحد مجنون و كلام واحد ليمون
– دي لعيبة معندهاش دم ..ملايين ايه اللي بيتكلموا عليها و احنا في المركز الاخير
… حضرتك اللاعيبة دي من شهر 11 لم تستلم جنيه واحد و مش كلهم لهم ملايين و ده تعاقد و كان لابد من احترامه
– بس اخدوا مكافاة الفوز علي بتروجيت و الاتحاد السكندري
… لم يحدث
– خلاص نلعب بالناشئين و نعلم اللعيبة دي الادب
… ناشئين ايه حضرتك .. انت عايز تهبط رسمي ..الناشئين كان فيهم رضا و العربي و شحتة و اميرو و يسري طربوش و افضل ناشئين في تاريخ الاسماعيلي و هبطنا إلي المظاليم 57/58 و بنفس الناشئين الموهوبين دول قعدنا في المظاليم 4 سنوات كاكبر نادي جماهيري قعد في المظاليم وقتها و اتغلبوا بالخمسة و بالستة و السبعة من اندية متمرسة في دوري المظاليم ..و الاتحاد و المصري هبطوا و رجعوا قبلنا
– الناشئين ابطال الجمهورية و مستواهم عالي
…. تاني ناشئين .. الناشئين دول حضرتك اولياء امورهم بيصرفوا علي النادي و جمعوا 200 جنيه علشان يشتروا ترنجات شبه بعض و المدربين بيملوا البنزين علي حسابهم و الناشئين دول برضه كان لهم 2000 جنيه اخدوا 500 فقط و الناشئين دول بيجيبوا المية و العصائر علي حسابهم و العضو المحترم بيهرب من الباب الخلفي اصلا
– بس لعبنا بالناشئين قبل كده و كسبنا
…كسبت ماتش لظروف طارئة و لم يكن تمرد جماعي منظم بالشكل ده
– يعني اللعيبة مش شايفين أن احنا في المركز الاخير و بيطالبوا بفلوس دول لعيبة كسر
… كسر مش كسر ..مين اللي جابهم و اتصور معاهم و بالاحضان و القبلات اتصور رئيس النادي و الاعضاء .. هو فيه لعيبة جاءت ووقعت غصب عن النادي .. اللي جاب اللعيبة دي كسر اصلا … و كلها وسائط و عمولات .. و علي فكرة اللعيبة الكسر ممكن تقعدك في الدوري لو عندهم استقرار
– طيب ليه يتركوا التمرين و احنا في موقف صعب و الجهاز الفني يمشي هو كمان
…. اساسا الجهاز الفني له شهر لم يقبضه اصلا و شكله مش مكمل و لا مدير فني يقبل المجيئ في الظروف دي
– حتى شادي ماهر اللي ما خرجشي من البيضة يعمل تمرد
….شادي ماهر تنازل عن فلوس لناديه علشان يجيي الاسماعيلي و الشيك اللي معاه مرفوض من شهر يناير
– يعني انت موافق علي التمرد
…. لا مش موافق .. لكن لاحظ أن التمرد جماعي و مرتب جيدا و في وقت توقف المباريات و ده معناه أن المشكلة كبيرة و لا تحل بتحويل اللاعبين إلي المستشار القانوني ( اللي مش موجود اصلا ) و القصة تحتاج تعامل زكي جدا و ده مش موجود علشان الكومي مش طايق نفسه اصلا و لا المجلس اللي معاه و هما مش طايقينه اصلا و الدنيا خربانة
– تقصد ايه
…. اساسا الكومي كان غلط يجيي و هو لن يدفع جنيه ( حسب قوله ) و اللي معاه كلهم بيكرهوه .. الا من استفاد منه الكومي نفسه و بيستفيد شهريا كمان
الموقف صعب و صعب جدا … وهو سيناريو تم اعداده بمهارة و تخطيط شيطاني من قبل الانتخابات و لا يمكن اعداده الا بمهارة و خبرة كبيرة
و اتصور أن ما يحدث حاليا هو اكبر من كان يتمناه الشياطين اللي خططوا لوقوع النادي و للاسف من انتخب الكومي مفروض يضرب نفسه بالشلوت
– طيب والحل ايه
الحل يكون من خارج مجلس الادارة … بشكل تنظيمي و تدخل لاستقرار النادي .. غير كده النادي رايح في داهية

Click to comment

Leave a Reply

لن يتم نشر عنوان بريدك الإلكتروني.

بقلم الدراويش