Connect with us

كلام خارج المقرر

رسميا .. الاسماعيلي في النفق المظلم ..و ألو يا همبكة

من البداية نقول ببساطة .. أن الكابتن حمد ابراهيم مظلوم في مباراة اليوم
والمشكلة أن حمد ابراهيم .. حيتظلم في المبارايات القادمة
ومش مهم اتظلم والا حيتظلم حمد ابراهيم
المشكلة أن الفريق دخل اليوم في النفق المظلم اللي نهايته الهبوط – لا قدر الله ذلك
لكن الشواهد زي الهباب و الطين
والنهاردة الاسماعيلي خسر مبارياته السابعة من عشرة و3 تعادلات و 3 نقاط من 30 نقطة
مش حنكرر ونقول احصائيات وأرقام تؤكد ما نقوله
ومن يريد مراجعة ذلك – يراجع التوبك التالي

الاسماعيلي في أسوء أسوء أسوء ,,مواسمه علي الإطلاق

لكن حمد ابراهيم اتظلم و لسه حيتظلم ليه
ندرسها سوا
مفيس مدرب في العلم او العالم .. ولو كان فان ديزل أو هالك هوجان .. يدرب امبارح و يمسك الفريق النهاردة في مباراة حرجة ومرتقبة
لكن مجلس الهمبكة .. قرر ابعاد الكباتن اشرف خضر ومحمد حمص واللي كانوا لابد أن يتولوا ادارة الفريق في مباراة الجونة
مجلس الهكمبكة عمل كده علشان .. طلب جماهيري
وليه حمد ابراهيم حيتظلم في المباريات القادمة .. نقولها ببساطة
لان حمد ابراهيم … اول مرة يتولي مهام الرجل الاول في الجهاز الفني
ممكن يكون له خبرة في دور الرجل التاني
لكن اجيب حمد من الدار للنار و اضع معاه مساعد اول مرة يلبس تريننج من ساعة ما اعتزل
حتى لم يدرب فريق ام زغلول للناشئين
وده لا يقلل من قيمة الكابتن سمير فرج من الاصل كانسان ولاعب محترم … لكن اجيبه من الدار للنار واضعه في جهاز فني مطلوب منه مهمة مستحيلة وهو اول مرة يدرب في حياته
و الكابتن سمير فرج .. معترف بكده
لكن لاسف .. الكابتن احمد سمير فرج .. اللي جاء بناء علي طلب الجماهير وبضغط من نائب الهمبكة اللي مش عايز رئيس مجلس الهمبكة يمشي إللي في دماغه … ودي قصاد .. دي
وزغرطي يا اللي انت مش غرمانة
طيب من الاصل مجلس الهمبكة والانتكة والزفلطة .. جاب 11 لاعب
و قالوا انها افضل فترة انتقالات في تاريخ الاسماعيلي
خوان براون قال انه لم يكن علي علم الا بثلاث صفقات ورئيس الهمبكة جاب باقي التعاقدات الجديدة يوم 31 .. والناس نايمين
الناس شتمت خوان براون لانه عرى مجلس الهمبكة وقال كمان أن رئيس النادي طلب منه ينزل لاعبين من الاوبيس
الناس شتمت براون … لانه اظهر المشكلة من اصلها
لكن تقول لرئيس مجلس الهمبكة .. انت غلطان
لا قالوا له انت سليل البهوات و الباشوات و من الاشراف كمان
كان مفروض مجلس الهمبكة… يجيب اربعة لاعبين تقال وجامدين … بدلا ممن 11 لاعب نص نص بناء علي طلب الجماهير
و يخلي افضل صفقات في تاريخ الاسماعيلي .. بعدين
………….
ولان الهمبكة هي الفزلكة ولا يمكن أن تري منها الا الزعططة
قالوا عايزين حسني عبد ربه
راح لهم حسني عبد ربه
ولكن نائب الهمبكة و من حوله .. قالوا له بلاش حسني والا حيبطلك الهمبكة
لان عبد ربه .. قال فين دفعة اللاعبين في اول يناير واحنا في اخر فبراير
ده كده عبد ربه .. حيتدخل في اللي مالوش فيه
وحيخلي رئيس الهمبكة ..مكشوف مكشوف
و كمان رئيس الهمبكة مش حيمسك الحديدة ولا يكلم شوبير وشلبي وقناة سبيس تون وسي بي سفرة
ولا كنا سمعنا قصة : اهرامات الاسماعيلي .. أو توأمة الاسماعيلي بيراميدز
لا .. بلاش حسني عبد ربه
لايمسك هو الحديدة وعبد ربه … كان شرطه كده .. ورئيس الهمبكة بيحب الحديدة
ونائب رئيس الهمبكة بيحب الحديدة
والطيب .. هو كمان مسك الحديدة وقال عبد ربه .. مالوش مكان ولا عندنا مسمي الوظيفة اصلا
وزايد كمان … زف البشري السعيدة بان الجمهور حيقعد في مدرجات الوسط
الله اكبر . تصفيق حاد
طيب ايه علاقة الحديدة و الوظيفة وسليل الاشراف ومدرج الوسط
بالخسارة من الجونة
ما هو ده كله اصل الهمبكة
همبكة في كل شئ … والله يرحمك يا توفيق الدقن يا فنان يا قدير
كان اسمه همبكة في فيلم ( بنت الحتة ) انتاج 1964
ومن سنتها الاسماعيلي موعود بمجالس خزعبلاية
لكن السنة دي موعدنا مع مجلس من نوع جديد .. اسمه مجلس الهمبكة
والهمبكة لا عمرها تنفع ولا تشفع
وكل في المجلس من بني همبكة و ألو يا همبكة
واصل كلمة همبكة ..من لفظ Humbug … ومعناه بالعامية – الفهلوة أو الكلام الفارغ و باللغة الفصحي .. الهراء
وما يجري داخل مجلس ادارة الاسماعيلي .. هو كل الفهلوة أو الكلام الفارغ و الهراء كله
طالما الهمبكة اسلوب حياة .. عند مجلس الهمبكة
طيب الحل ايه


الحل أن يبعد مجلس الهمبكة عن الهمبكة

الهمبكة اللي اضاع المعلم زكي واضاعت  همبكة نفسه

وفي النهاية كل بني همبكة وقع … شقع بقع 

وربنا يسترها علي الاسماعيلي وعلي جماهيره 

وانتهي الكلام خارج المقرر

Click to comment

Leave a Reply

لن يتم نشر عنوان بريدك الإلكتروني.

بقلم الدراويش