Connect with us

كلام خارج المقرر

سنة سودة عليكم يا مجلس الهمبكة

كتب:daraweesh

خلص  الموسم بمٌره و مٌره .. و ما شوفنش فيه حاجة حلوة نفتكرها مع مجلس المسخرة و الهمبكة و الهنكره 

ومن يزرع .. يحصد من ذات ما زرعه .. من يزرع  حنظل ..لابد ان يجني حنظل ومن يزرع همبكة .. لابد ان يحصد همبكة .. مش عايزه كلام 

ولا تقول لي اتغلبنا من طلائع الجيش علشان فريق منظم واننا لعبنا بالاشبال واننا ظلمنا حمزة وان ,,,, وان,,,,  … لان كل حاجة غلط في غلط .. من مجلس انضف عقل فيهم .. عنده عته 

مجيئ حمزة من الاصل غلط ورحيله غلط واستمراره غلط .. وقرار اللعب بالناشئين غلط ولو كنا لعبنا بالكبار غلط…. اي حاجة حيقررها مجلس الهمبكة و رئيسه غلط في غلط … لان داوخل كل من في المجلس اسود من هباب الحلة و السواد خارج من جواهم مهبب وجوهوهم … و انظروا الي عضو مجلس الادارة السايكو .. تعرفوا قصدي ايه  

واوعي تصدق اي واحد منزل صورة صاحبه من الناشئين .. وقال عنه ان له مستقبل وانه حيبقي مارادونا زمانه 

وكل واحد بيفرك ويمسح جوخ  لكل لاعب ناشئ وانا شخصيا لم اري ناشئ واحد يمكن ان يكون نجم المستقبل – لكنهم معذورين – لان لو كان الكابتن حمزة  بيعطي لهم وقت = عشر وقت ما حصل عليه محمد مخلوف واحمد مصطفي وقبلهم وجيه عبد الحكيم..كان زمان عندنا لاعبين  يمكن الحكم عليهم .. وده الفرق بين حمزة وفيريرا الزملكاوي … البرتغالي عنده عقل والمنوفي عنده زلطة … وحمزة قالها حكمة : الضربة اللي لا تقتله بتقويه وتنفحة  . وفضل يقوي ويقوي ويتنفخ ويتنفخ …  لحد ما طار- فسسسسسسس ..بعد ما ورانا الذل والمرار 

May be an image of 9 people and people standing

 تحليل موضوع اللعب بالصغار – و لا هما صغار  و لا حاجة … طالما تعدي 20 سنة يبقي مش صغير الا القليل .. محتاج مختصين و حماء لتحليلها .. لكنه يظهر ان الكابتن الجمل تنمية بشرية … محتاج درس تنمية بشرية !!!

 صحيح فريقنا , فريق تايك و مهترئ و فاضي و مقرف و مع ذلك  فيه لاعبين يمكن البناء عليهم .. رئيس مجلس الهمبكة في تسجيل مسرب ( موجود ) .. بيقول لمدير مكتب نادي العروبة الاماراتي .. انا الرئيس و انا موافق و حابيع اللاعبين لكن بشكل فردي ..كل لاعب لوحده .. يا تري ليه 

 سعادة الهمبوك الاكبر .. معاه دلوقتي ملف  بيثبت به كل مليم دفعه في النادي الاسماعيلي (  من الشهر الاسود في يونيو 2006  اللي شفنا فيه وشه الكريم و طبعا اثبات ما دفعه  السنة السودة 2022 )   … و اصبح مع الهمبوك  اثبات يغطي لو استولي علي  ( 8 مليون و كسور +  7 مليون و كسور  ) يعني حوالي 16 مليون …  يعني مليون دولار ..  و كل لاعب لوحده  مع العروبة … فهمتوا و الا اشرح زيادة .. اتصور عزيزي القارئ ..فاهمني كويس 

عايز شرح زيادة .. فاكرين شيك الاهلي لشراء سيد معوض في ديسمبر 2007 …. كان بأسم مين .. مش حاشرح اكتر من كده .. اظنها وصلت

 هو ده الدماغ اللي في يده القرار و مكروه من باقي المجلس وكل واحد في المجلس بيكره الهمبوك الاكبر .. لغرض ما ..واحد بيكره علشان عايز يجلس مكانه .. و التاني بيكره علشان اتقلت عليه المصلحة .. والثالث لا بيهش ولا ينش .. والرابع بياكل مع القطيع .. المش.. القصة كلها بلاوي و مصائب لم تظهر بعد 

وشهر ديسمبر .. حيكون هو شهر الصراع والفضائح والجرس .. وخاصة بعد تسريب الملف الصوتي للهمبوك الاكبر اللي قال فيه – ضمنا – انا الرئيس و باقي المجلس طراطير .. فهل سيوافق الطراطير فعلا .. انهم طراطير 

و علي السادة اللي زعلانين من برنامج  مجدي عبد الغني و محمد فاروق .. يجهزوا  علاج السكر و الضغط  و الاسهال … علشان الشهر الجاي .. حيكون اللي ما يشتري يتفرج  علي الفضائح و الجرس و علي عينك يا تاجر واللي ما يشتري .. يتنيل 

 صحيح ان السنة اللي فاتت كانت سودة علي الهمبكة .. لكن السنة الجاية لو استمر مجلس الهمبكة .. حتبقي كحل غطيس . لا حتشوف و لا حتي كفك …  و ربنا يسترها معانا 

 عموما كل سنة وكل موسم و جماهير النادي طيبين و بخير ( ماعدا من انتخب الهمبوك الاكبر )

ومرة اخري … استرها معانا يا رب 

 وانتهي الكلام خارج المقرر 

Click to comment

Leave a Reply

لن يتم نشر عنوان بريدك الإلكتروني.

بقلم الدراويش