Connect with us

كلام خارج المقرر

لاعبين و مدربين و همبكة لا يستحقوا الفوز او الفرجة 

بصراحة من غير لف او دوران .. اول مرة في حياتي … لا اصفق او أهلل بعد فوز الفريق … لماذا … لان خلال 128 دقيقة من الوقت الاصلي والضائع والاضافي  …. كل الاحساس راح وامل ضاع وحماس مفقود .. والقرف موجود 

تشعر وانت بتتفرج علي فريق الاسماعيلي ..كأنك بتشاهد عك وضعف وقلة حيلة وشك وقلق وكام واحد لابس اصفر ومجنون ومهطول  .. و كلهم زي قرد فاشل فمش عارف يعمل .. عجين الفلاحة و نومة العازب 

لكن الحمد لله علي كل حال ..ان  اسم الاسماعيلي صعد الي دور الــ 16  من كاس مصر … ولكن كل اللاعبين اليوم ( فيما عدا الحارس محمد فوزي ) وكل الجهاز الفني اللقيط الشنقيط .. لا يستحقوا الفوز او حتي التعادل ( غير ممكن ) .. او يستحقوا ..من الاصل الفرجة 

الفريق مهلهل ومفكك وصواميل ركبة مفككة ولا عربية سيات 133 خارجة من ورشة المعلم الفسخاني …. لعيبة علي ما تفرج .. بيقودهم جهاز فني … عاجز وفاشل ومش شايف .. من بداية التشكيل وطرق التعامل مع المباراة

و لو جبت واحد عبيط او ابو ريالة . و قلت له اختار جهاز فني لفريق بيعاني و يصارع للهرب من الهبوط .. مش حيختار جهاز فني … رئيسه ,, اول مرة يبقي مدير فني…  و مدرب مساعد ,,, اول مرة يكون مدرب مساعد .. و مدرب,, اول مرة يكون مدرب 

يعني جهاز ابيض يا لفت … ابيض يا لفت 

و ظهر من اول 3 دقائق ان الفريق رايح في داهية و فرصتين للتهديف لفريق بتروجيت ..  الاسماعيلي عاجز عن ان يعدي وسط الملعب و نقل الي الخلف ثم الخلف ثم الخلف .. و احسن نقل للكرة كان بالعرض !!!! … و حتي د 21 لم يكن للاسماعيلي تواجد في نصف ملعب بتروجيت الا بتسديدة علي حارس بتروجيت محمد بونجا من محمد عبد السميع !!!! و بعدها راسية من الارجنتيني دييجو منين … د 35 .. و هما دول الكرتين اللي وصلنا بيهم  لمرمي بتروجيت .. غير كده ابيض يا لفت 

 ونسبة استحواذ سلبي تصل الي 70% واللي قاعد واللي واقف علي دكة من جهاز فني زي شادر البطيخ الاقرع .. لا لون و لا طعم و لا ريحة .. مفيش حاجة خالص …دماغ فااااااضية و الدليل اهو:  

 الفريق فاضي تماما وتشكيلة غريبة وعجيبة وكان الفريق مش محتاج المباراة ليستعيد الثقة باداء وفوز سهل وبسكور كبير و جميل …  لكن الجهاز الفني البطيخي له وجهه نظر تانية وطلعت فاشلة طوال الشوط الول الباهت الماسخ

بدأ الشوط الثاني بنفس اللاعبين .. يقوم الجهاز البطيخي يغير في الدقيقة 51 … ليه مش من أول الشوط الثاني .. مش عارف

والحمد لله .. اننا لم نشاهد النجم الخارق السبيدرمان والايرون مان مخلوف  !!!!

 وعلي فكرة كل ما سبق ليس تقليل من الجهاز الفني او اللاعبين .. انما العيب و الشوم واللوم علي من اختارهم .. سواء لاعبين او مدربين … و اللاعبين بياخدوا ملايين و مش خاسس عليهم حاجة .. والمدربين لابسين جلاليب اكبر من مقاسهم … و بتكعبلوا فيها كل خطوة .. مين اللي جابهم .. هم مجلس الهمبكة برئاسة الهمبوك الاعظم و معاه شوية الهمامبيك 

 نرجع للماتش .. الشوط التاني زي الشوط الاول .. عك وعبط وفلحسة وشنكلة وبهلله .. ولاعبين بتروجيت افضل من لاعبي الاسماعيلي 200 مرة ومرة ومحمد فوزي ينقذ هدف من السكران قبل اخر المباراة الاصلية .. و لعبة كاريكتورية من راسية من عماد حمدي و الحمد لله انها تسلل و الا كانت من ضمن فيديوهات الججز وطرئف وعجايب … والفار لا يوافق علي ضربة جزاء صحيحة للاسماعيلي وهدف ضائع من وجيه بك عبد الحكيم والشامي د 119 .. ومفيش غير ضربات الجزاء ..اللي ممكن تساعد وتسعد الجمهور الحزين 

والحمد لله .. فزنا ببركة اللاعب محمد نور البتروجيتي وضربة الجزاء الاخيرة ,,, اللي انقذها نجم المباراة محمد فوزي .. وصعدنا الي دور الــ 16 ونحن لا نستحق الصعود او اللعب من الاصل 

 فزنا علشان الجماهير الطيبة الشقيانة .. وليس بعض الجماهير اللي كانوا بيقولوا ( الايفواري يا كومي ) ويروحوا بليل يأكلوا السمك والجمبري في مطعم الصلاة علي النبي .. وده اقل واحد من الجماهير استفادة من موائد الانس والهمبكة الكومية من شهر  اكتوبر الماضي الي الان … و الا..  كمان … عضو مجلس الادارة بتاع خريطة ساحل العاج اللي جاب الديب من ديله .. وقلق نومه في عز الليل … جماهير ودت النادي والفريق في ستين داهية 

ولو عايزين الخلاصة 

 الخلاصة .. لن يفلح الاسماعيلي ولن يبقي في الدوري الممتاز … ومجلس الهمبكة موجود فيه

مجلس الهمبكة تم تشكيله بارداة وتصميم عثماني شيطاني رهيب . وهما عارفين بيعملوا ايه…. وجابوا تشكيلة لا يضعها ابليس نفسه .. تشكيلة كلها مضروبة تماما ومختارة بعناية شيطانية .. علشان يقولوا : ولا يوم من ايامك يا ابراهيم بك .. وفعلا قالوها علشان الرواتب للموظفين … لم تصرف في وقتها و متاخرة 10 ايام  

 هي دي الخلاصة … وده كلامي و انا مسئول عنه … لان الله لا يفلح عمل المفسدين  و غير المتطهرين والمرتشين والشماشرجية و المنافقين 

 انقذوا الاسماعيلي … قبل ما يضيع نهائيا 

 وانتهي  الكلام خارج المقرر 

1 Comment

1 Comment

  1. ايمن الاسماعيلاوى

    12 مارس، 2022 at 10:25 م

    فعلا طول ما الكومى موجود
    الهبوط فى الطريق

Leave a Reply

لن يتم نشر عنوان بريدك الإلكتروني.

بقلم الدراويش