Connect with us

عيون إس سي

ليه الاسماعيلي عقيم هجوميا ؟؟

بقلم عبد الحميد عاطف … ليه الاسماعيلي انعدمت شخصيته ؟؟
تعالوا نحلل الموضوع واحدة واحدة
اول حاجة الخطة الهجومية بتحتاج : قلب دفاع يبدأ الهجمة + ظهيري جنب + لعيب وسط نمرة 8 ينقل الكورة + لعيب صانع العاب نمرة 10 يصنع فرص ويعمل ثروهات + مهاجم صندوق مشاغب يترجم الفرص لاهداف
اولا قلب الدفاع اللي يبدأ الهجمة
كان زمان عندنا لعيبة بتبدأ الهجمة من تحت وتشكل خطورة
زي فوزي جمال – رضا سيكا – عماد النحاس
اللعيبة دي كانت مدافعين بدرجة صانع العاب كان ممكن يكملوا ورا الفراودة ويصنعوا اهداف
ويعملوا تمريرات طولية يخلوا المهاجم هو والجون
ممكن يبدأوا الهجمة ويرقصوا كام واحد ويبقوا في نص ملعب الخصم بسهولة
انهاردة هل المدافعين بتوعنا عندهم الحتة دي ؟؟
هل عمار وكاستيلو وهاشم وباهر والصحراوي يقدروا يعملوا النقطة دي ؟؟
يعنى اول عنصر مفتقد
ثانيا : ظهيري الجنب
للاسف الشديد ماعندناش الظهير اللى يتقال عليه ظهير عصري ياخد الخط من الكورنر للكورنر ويعمل اوفرات ويصنع اهداف
ماعندناش عاطف عبدالعزيز والسلحدار او فوزي جمال
ماعندناش اسلام الشاطر وسيد معوض
ماعندناش صديق وسمير فرج
الناس دول كانوا بيعمل شكل هجومي جامد للفريق وكانوا مفاتيح لعب للفريق وافتكروا دوري 91 لما عاطف وادهم وفوزي كانوا مفاتيح نص الاجوان اللى جبناها
ودوري 2002 كان الشاطر وسيد معوض مفاتيح نص الاجوان اللى جبناها
انهاردة للاسف الشديد ظهيري الجنب عندنا لسة بدري عليهم عشان نقول عليهم انهم ظهراء عصريين
في الجنب اليمين عصام صبحي : لاتعليق
احمد ايمن متهور جدا في الجانب الدفاعي وفي الهجوم اوفراته سيئة جدا جدا
في الجنب الشمال
عبدالله جمعة ودسوقي اللى لعبهم كورة ظلمهم بصراحة
بالتالي تاني عنصر في الخطة الهجومية مفتقدينه
العنصر التالت :
لعيب الوسط نمرة 8
اللى هو من الاخر :
عصام عبدالعال – محمد حمص – حسني عبدربه
اللى كان الثرو منهم بجون
كانوا بيملوا منطقة الوسط ويعملوا ثروهات ويوزعوا هجمات عالجنبين ويعملوا تمريرات طولية وبالعرض وعندهم فن المراوغة والتسديد
انهاردة مين عندنا اللى في خط النص ؟
مع احترامي لدونجا والوحش واحمد مصطفى ومخلوف وعماد حمدي
للاسف احيانا بيباصوا وهما وشهم في الارض
مابيعرفوش يعملوا مراوغات ولا ثروهات ولا يعملوا تمريرات بالعرض
واحيانا كتير تمريراتهم بتتقطع في نص الملعب ومفيش اي مهارة في التسديد
يعني حتى تالت عنصر مفتقدينه –
العنصر الرابع
لعيب صانع العاب نمرة 10
اللى زي احمد العجوز – عمر جمال – محمد بركات – عبدالله السعيد
اللعيبة دي كانت عندها استعداد تهد أي دفاع
وتقدر تقول لعيبة متكاملة جدا جدا جدا في الكورة
مهارة فردية عالية لاقصى درجة
ثروهات مفيش بعد كدة
ممكن يجيبوا لنا ضربات جزاء بسهولة جدا جدا جدا
انهاردة احمد مدبولي وصادق مع احترامي ليهم هل فيه واحد فيهم فيه المميزات دي ؟؟
هل فيه واحد فيهم ممكن يعوض نص مستوى العجوز وبركات وعمر جمال ؟؟
يعني رابع عنصر مفتقدينه هو كمان
العنصر الخامس
المهاجم المشاغب جوة الصندوق
كلنا اتفرجنا على اوتاكا ومحمد صلاح ابوجريشة ومجدي الصياد وياسر عزت واحمد علي ومصطفى كريم
اللعيبة دي كانت ممكن تخطف جون في اي لحظة
عندهم قوة جسمانية وسرعة ولياقة وتمركز صحيح
مهاجمين مشاغبين من الاخر
انهاردة احنا الفراودة اللى عندنا مين ؟!!!
شيلونجو : بيقف جوة المنطة بيستنى الكورة تيجي وحتى لما الكورة تيجي له رجليه ضعيفة جدا جدا جدا
شكري نجيب : ماعندوش اساسيات المهاجم
بعد سرد النقط دي كلها ياريت نحلل بالمنطق
ولما نيجي ننتقد مدرب نشوف الاول القماشة اللى معاه عاملة ازاى
لا عندنا قلب دفاع يبدأ الهجمة ولا عندنا ظهيري جنب يزيدوا ويعملوا اوفرات ولا عندنا لعيب نمرة 8 يوزع لعب ولا عندنا نمرة 10 يصنع اهداف ولا عندنا فرود يحط اجوان
ومستغربين ان حالنا كدة ؟؟
1 Comment

1 Comment

  1. ايمن الاسماعيلاوى

    27 نوفمبر، 2021 at 6:05 م

    كلام سليم جدا بإستثناء
    عبد الله جمعه ظهير ايمن وليس أيسر ولو لعب مكانه سيكون افضل كثيرا

Leave a Reply

لن يتم نشر عنوان بريدك الإلكتروني.

بقلم الدراويش