Connect with us

كلام خارج المقرر

مبروك و حمد و الصدمة و سيحا … و أسكت يا كومي

انتهت المباراة بفوز الاسماعيلي علي الاتحاد السكندري بالاسبوع 13 من الدوري الممتاز و محققا الفوز الاول للفريق من 141 يوما بالدوري ,,مع مراعاة الفوز بالعافية علي بتروجيت بكاس مصر و بضربات الجزاء و الفوز اللي خدعنا كلنا في كاس الرابطة … الفوز بثلاث نقاط و الحمد للهرب العالمين شئ جميل و رائع بطبيعة الحال و يهدي الاعصاب قبل توقف المسابقة الرئيسية و الحاسمة في مصير فريق الاسماعيلي .. و الاجمل من الثلاث نقاط نفسها هي عدم اتساع الفارق مع الفرق المنافسة للهروب من سقوط في بئر المظاليم .. حيث ان ايسترن كومباني و مصر المقاصة 9 نقاط من 12 مباراة و امام ايسترن كومباني لقاء مع طلائع الجيش 13 نقطة يوم غدا الخميس اما مصر المقاصة مؤجل لها مباراة و لن تقام بالايام الحالية … لن يعود الدوري قبل لقاء الدراويش مع المصري يوم 13 ابريل .. يعني بعد 28 يوم … مش عايزين نسمع فيها تصريح او مداخلة او سيرة المهندس يحيي الكومي ,, رئيس مجلس ادارة الاسماعيلي و لا اي واحد من مجلس الهمبكة كله علي بعضه

ليه … لان الموقف لسه منيل بستين الف نيلة و نيلة

يعني احنا لا فتحنا عكا و لا حتي علبة سردين .. و لسه كتييييير قوي لما نفرح الفرح الدراويشي اياه و القصة احزن من اننا نبتسم من الاصل .. و كتير و منهم العبد لله ..تحكموا في دموعهم .. و كتير دموعهم سالت بعد ما صفر الحكم محمد عادل منقرع و اعلن عن الفوز الاول للدراويش من اربع شهور و 21 يوم

لكن السؤال هو .. هل سيكمل حمد ابراهيم المشوار مع الاسماعيلي و الا ايه اللي حيحصل بالظبط

علشان نجاوب علي السؤال ده من باب العارف ببعض بواطن الامور .. اقول لكم ان هناك اتصالات تمت بالفعل مع الكابتن حسام حسن و لكنه طالب مبلغ مع طاقمة كبير جدا ( 2 مليون جندي ) و تم الاتصال مع مارك فوتا اللي قال لو خرجت مع فريقي من المنافسة ( انا جاي و غلاوتك يا خضر جاي .. بس مين في الفريق من نجوم !!!!!! ) و ايضا تم الاتصال بالمخضرم جدا جدا ( يوسف فييرا ) بس كان نايم و رد متأخر .. و هناك اختلاف داخل المجلس بنسبة 1: 3: 3 .. لكل مدرب من الثلاثة و كل يغني علي ليلاه و قيساه كمان… و لكن هناك اتفاق علي رحيل حمد ابراهيم . من حيث المبدأ و دي الحاجة اللي اتفق عليها المجلس ..بعدما تناولوا وجبات محبشة من فندق اللاعبين علي حساب النادي .. و ايضا اجمعوا علي ان الفراخ البانية كانت مقرمشة و كويسة !!!!! بس المكرونة كانت محتاجة سنة سوى زيادة !!!!

طيب اللي كاتب الكلام ده … بيفضل مين … حارد عليكم اقوللكم .. دام فضلكم

العبد لله لا عايز حمد ابراهيم يكمل و لا ما يكملشي .. لان ده قرار فني 100000% و لا يجب ان يتم اتخاذه قبل وجبة الفراخ بانية او بعدها !!! .. لابد ان يكون الفراخ – قصدي القرار – يكون من واحد كورجي ابن حلال ( مشوها ابن حلال ! ) و يكون فاهم و صايع كورة علي حق .. يعني لا انا و لا انت يا عزيزي القارئ نقرر ذلك و ده مسئولية خطيرة جدا جدا و خصوصا في الايام الغبرة و السودة زي الزيتون الكالاماتا في تاريخ الاسماعيلي

و العبد لله – و الحمد لله – اريد ان احتفظ بلستة الكلين شيت – لان عمري ما قلت او رشحت لاعب اومدير فني و لا حتي سواق لاتوبيس النادي .. و علشان اكون بعيدا عن المساخيط اللي ابتلى بهم النادي الاسماعيلي من بتوع ( الايفواري يا كومي ) و ( حمد ياكومي ) و ( ديسابر يا كومي ) و ( اي نيلة يا كومي ) ….. لان القرار لابد ان يكون ( مرة اخري ) من واحد واحد كورجي ابن حلال بجد وفاهم و صايع كورة علي حق و عنده ضمير فيكس سايز .. لا بيوسع و لا يضيق حسب التساهيل

و اتصور ان مجلس الهمبكة سمع و استجاب لكلام المساخيط الفيسلوكية … و مشي المجلس ورا العيال و اللي يمشي ورا العيال ….. و ادي النتيجة كلنا شايفينها عاملة سواد زي قعر الحلة فوق باجور جاز مهبب … و لابد ان يكون القرار صح الصح و بلاش الفيسبوك يا كابتن محسن عبد المسيح يا مشرف علي الكورة يا جيل الاسطورة الامبراطور محمد حازم …. و مش عيب يا عم محسن يا سيحا انك تتصل بكبار الخبراء الاسماعلاوية و تسمع ارائهم جيدا و تسمع نصائحهم جيدا … و تتمسك برائيك جيدا و لا تتنازل عنه نهائيا .. و لا تميل مع مجلس الهمبكة ..حتي لا تصبح جزء منهم – و انت مشرف علي فريق, مشرف علي الغرق من الاصل

اذن القصة كلها معلقة برقبة الكابتن سيحا من الالف الي الياء .. انت الاصل في قرار الابقاء علي حمد ابراهيم او رحيله من الاساس .. يعني لا تسمع كلام الكومي و كلام الهمبكة… و لو ما سمعوش كلام .. قدم استقالتك علي الفور .. حيث اننا لا نتحمل صدمة جديدة من احد اباطرة جيل الاباطرة بقيادة محمد حازم … هو ده السطر او الاسطر اللي فيها الخلاصة

كفاية هطل و قرارات محدش فاهمها من هو المسئول عنها و يجب علي ( سيحا ) ان يعلم مقداره عند الجماهير و يعلم ان الموضوع معلق في رقبته بنسبة 100% .. نتصور ان سيحا ( لو استشار الكبار ) و اتخذ قراره السليم ..سنقف كلنا وراءه مهما كان القرار .. انا اتحدث عن العقلاء و ليس عن المساخيط اللي عندهم حالة من الانتفاخ الفني الغير مبرر …. لان الموقف صعب و اسود من السواد .. و نحن ليس في حمل صدمة ان نرفض عطايا الله سبحانه و تعالي … قبل التوقف هناك فوز علي الاتحاد و فوز و لو بالعافية في كاس مصر .. و من بعده توقف … ننتظر الكلام السليم … بعيدا عن البانية و المكرونة الناقصة سوى

و انتهي الكلام خارج المقرر

1 Comment

1 Comment

  1. ايمن الاسماعيلاوى

    16 مارس، 2022 at 9:05 م

    حسام حسن ايه وزفت ايه
    مصيلحى وفر له لبن العصفور وفشل عايز تجيبه ياكومى يكمل مسلسل فشله
    اما مدرب محترم مثل باتريس نوفو او ديسابر
    او بقاء حمد ابراهيم

Leave a Reply

لن يتم نشر عنوان بريدك الإلكتروني.

بقلم الدراويش