Connect with us

كلام خارج المقرر

همبكة الكومي و 81 دقيقة مصطفي و زلطة حمزة و التعادل مكسب

كتب:daraweesh

ما هو المصائب .. لا تحضر إلا بالجوز  و علشان تبقي الخيبة دوبل .. يبقي عندنا رئيس همبوك و لاعب بعكوك و مدير فني زلطوك

يعني  الكابتن حمزة الجمل المدير الفني للاسماعيلي في يونيو 2022  .. بعد ما حرق دم الاسماعلاوية كلهم بالاختراع المدمر اللي اسمه : وجية عبد الحكيم…  و ضاع و ضيعنا معاه

و قلنا ماتش المقاولون هو عنق الزجاجة و ماتش ب 6 نقاط  و …… و ….. و ,,,,

وضاع ماتش المقاولون بسبب وجية حمزة عبد الحكيم الجمل

قلنا ماتش غزل المحلة والمنقذ وماتش ينطرنا فوق وحيعمل ويسوي

جاء الجمل الزلطة افندي أو الزلطوك باختراع أخر اسمه : احمد مصطفي علشان يكمل علينا كلنا وياخد ثواب وحسنات … كل مشجعين الاسماعيلي في داخل محافظة الإسماعيلية وخارجها

وكمان ايه لما حب الكابتن حمزة الأبيض الجمل .. يعمل تغييير هجومي كان في الدقيقة 81

يانهار زي قعر الحلة وطبقا لدماغ الزلطة وهمبكة الهمبكة .. التعادل مكسب 

يعني حمزة الأبيض لم يشاهد احمد مصطفي طوال المباراة انه خارج المود والكود والحود والسود .. وسايبه في الملعب لحد الدقيقة 81 .. لحد ما ضاع الملعب ومع احمد مصطفي ,,, هناك الشامي اللي اثبت انه افشل مهاجم في تاريخ مصر بالدقيقة 68 …. وليس له علاقة بكرة القدم علي الاطلاق

هو عايز ينزل النبريص .. علشان يحرق النبريص ويسكت اللي عايز النبريص واللي جابوا النبريص من اهالي الفيسوبوكية السوشيال ميديا

ليه قلنا أن حمزة الجمل .. ابيض .. وابيض من شق اللفت كمان وليه قلنا ان المصائب لازم تيجي بالجوز وبالكوم كمان

لان اللي ما بيفهمشي كرة خالص وعبيط كمان في فهم كرة القدم .. لابد أن يعلم أن المشكلة في الاسماعيلي وفي خوان براون وحمد ابراهيم وحمزة الجمل كمان

أن مفيش هداف في الاسماعيلي

ايوة .. هي دي مشكلة الاسماعيلي منذ تم بيع  جون انطواي عن طريق مجلس المغارة في 2014

وخلينا نترجم بالارقام 

اهداف الاسماعيلي الدوري ده ١٧ هدف منهم ٤ ضربات جزاء
هدافين الفرقة
الشامي ٥ اهداف
باهر ٣ اهداف كلهم ضربات جزاء
مدبولي هدفين
عبدالرحمن مجدي هدفين

يعني واضح تماما لكل واحد بيشوف  .. ان المشكلة في التهديف والهداف ..كل الارقام بتقول كده ولا شئ غير كده

يقوم رئيس الاسماعيلي المبجل و المهمبك يجيب 11  تعاقد كسر .. باعترافه  هو بنفسه

 يعني الهمبوك هو سبب كل البلاوي 

ومن بعده يفشل المدير الفني اللي هو حمزة الجمل في صناعة هداف او حتي مجرد محاولة صناعة هداف … و الا هو حازم مرسي ..لازم يكون اسمه ابو بكر مرسي الجمل !!!!!

ويعمل الجمل مباريات ودية بالجملة .. والمهاجم  اللي يجيب جول في المباريات الودية .. لا يشارك في المباريات الرسمية !!!!!

واشتغل الحمزة الجمل علي وجيه عبد الحكيم ومن بعده احمد مصطفي والاخير النهاردة ابدع وتجلي وخاصة في الدقيقة 21 و 28 و 34 ..و كان السبب في فشل 3 هجمات مرتدة … وصورة تخلي ابرد مدرب في الدنيا يسحب احمد مصطفي ويدي له قلمين علي وشه

لكن الجهبز حمزة الجمل .. احتفظ باحمد مصطفي الي الدقيقة 81 … ذكاء ما بعده ذكاء

وكمان في الدقيقة 67 يخرج عبد الرحمن مجدي اللي كان عامل شكل و تواجد هجومي !! ..و يخرج عمر الوحش اللي كان ماسك خط النص … كله يخرج … لكن احمد مصطفي ما يخرجشي …. الا لما يجيب لنا الضغط والسكر 

وما تعرفشي ولا ما تتوقعشي اي لاعب  بعكوك .. سيعتمد عليه الجهبز حمزة الجمل في المباراة القادمة 

 علشان يحرق دمنا  ودم اللي جابونا .. امام سموحة .. زلطة زلطة 

وعايز اعرف ايه فائدة محمد حمص واحمد قناوي وايمن كمال … واقفين وخلاص 

 يا أخي ده لولا قائم مرمي الاسماعيلي اللي شال جولين النهاردة … كنا خسرنا بدري بدري 

ولو قعدنا نتكلم عن الماتش واللي حصل فيه .. سنتأكد ان عملية استمرار الهروب من الهبوط .. مستمرة معانا الي اخر دقيقة من اخر مباراة  بالموسم الحالي 

ولو عايزين السبب … اقول لكم 

 قبل سفر الفريق ..اجتمع رئيس النادي بعدد من اللاعبين و ذلك بعد مجهود كبير لجمع اللاعبين من فترة راحة و اعتراض هناو هناك  و بعد ما جاء اللاعبين .. مجبرين .. نظر لهم رئيس النادي بتأثر غريب …. وقال لهم : عايزيكو  تفوزا بالمحلة لان لو خسرنا .. انا مش قاعد في النادي ساعة واحدة.. انتهي الاجماع  علي كده !!!!!!.. لكن رئيس النادي قال لاحد المقربين منه : او الجهاز الفني خسر في المحلة ..حأشيله !!!!!!!!

طيب منين حتمشي يا عم الهمبوك لو خسرنا في المحلة … ومنين حتمشي الجهاز الفني لو خسرنا في المحلة .. برضه … همبكة همبكة .. وبعد 24 ساعة كلام في كلام في كل الفضائيات .. رئيس الهمبكة واللي معاه قطعوا ( خنس ) ولا واحد فيهم بيتكلم ولا يفتح بقه عن الانسحاب .. وكل المجلس اكل سد الحنك واتكتم 

بعد ما مشي رئيس النادي … يا ريت كان اتسجلت كمية النكات والقفشات و التحفيل و عدم الثقة في اي شئ يقول رئيس النادي … و رغم محاولات مدير الكرة لافهام اللاعبين عن هناك فرق بين ادارة النادي .. و النادي الاسماعيلي نفسه بتاريخه و قيمته  و ان ما يجري في المستطيل الاخضر … سيكتبه التاريخ بعيدا عن اسم من كان في رئاسة النادي

 لكن هناك حالة من عدم الثقة في اي شئ يخص ادارة النادي واصبحت فضائح بعض اعضاء مجلس الادارة دائما الحديث داخل النادي واخرها تعيين شقيق عضو مجلس ادارة مدير فني لفريق الصالات ,,  براتب وبمبلغ يساوي اكبر من كان الجهاز الفني السابق يستلمه .. كل شئ  واكثر .. هو مشكلة في حد ذاتها داخل الفريق و النادي ككل طيب عايزين الخلاصة 

 لو عايزين الاسماعيلي ينجو من الهبوط .. لابد من رحيل مجلس الهمبكة بالكامل ومعالجة موضوع المدير الفني للفريق الاول بشكل محترف .. ويتم تغييره فورا 

انا قلت راْي الخاص وربنا يسترها مع الاسماعيلي 

ونواصل الكلام خارج المقرر

Click to comment

Leave a Reply

لن يتم نشر عنوان بريدك الإلكتروني.

بقلم الدراويش