Connect with us

كلام خارج المقرر

هو الفوز حرام .. يا شيخنا خوان براون 

هو سؤال بسيط …. هو احنا أمتي نجيب جول و جولين و ثلاثة .. علشان لما يدخل مرمانا ما نتعادلشي او ما نخسرشي

لا تقول لي الصفقات لسه جديدة و في التليين و لسه السيرفس الاول و تغيير الزيت .. كلنا عارفين كده و متأكدين و النهاردة يوم 21 يناير و مجلس السيرك نايم في ماجور العجين و غطسان غطسة و ما قبش بعدها

قلنا قبل ما نعرف ان فيه كاس الرابطة او كاس المفكوكة – لازم الصفقات كلها تكون في الملعب اول يناير .. علشان احنا حالنا في منتهي الخطورة و في منتهي القلق … لكن مجلس السيرك و رئيسه واكلين شاربين و قاعدين و نايمين في الفيس بوك و الواتس اب … و نسيوا مهمتهم الاولي و هي ادارة ملف الصفقات التعاقدية الشتوية … و رئيس مجلس السيرك بيحب الميكرفونات و بينام و الموبيل علي المخدة و بينتظر اي اتصال و لو حتي من نجلاء الشرشابي …حاجة كده علي قد الأيد …. و زي باقي المجلس بيحبوا البوسستات و خرائط ساحل العاج و حتي الاعلامية اللي في المجلس نسيت شغلتها و سكتم بكتم و خرساء و بكماء بخصوص الاعتداءات الشوبيرية … ده ايه المجلس ده .. فعلا مجلس السيرك

تحس ان كل اعضاء المجلس بيلعب في حتة .. تحت خيمة السيرك .. مالوش دعوة بالتاني

اخونا الشيخ الارجنتيني لاقيني و لا تغديني خوان براون .. مضطر يجرب و يجرب و حظه حلو ان صامويل ايتو الكاميروني أصر علي اقامة دورة الامم الافريقية في ميعادها .. الا كان الدوري استمر و رحل خوان و السيرك في شحنة دليفري واحدة

لكن احنا لم نستفاد من اصرار الكاميروني صامويل ايتو …. و تعاقدات متاخرة و تجارب و تجارب … و مفيش في يد خوان الا التجارب و عدم القدرة علي التحكم في ادارة الشوط الثاني خصيصا و خاصة العشر دقائق علي وجه الخصوص و خاصة اخر دقيقة علي وجه الخصوص الخصوص و اللي فيها شال احمد عادل عبد المنعم هدف 100% من اللاعب احمد سعيد في الدقيقة 98 … و كان خوان برضه علي موعد مع الطائرة الي الارجنتين

البنك الاهلي من الدقيقة 70 من الشوط الثاني و واضح انه حيسجل هدف التعادل و الاخ خوان ومعاه اشرف خضر و الاخ محمد حمص اللي انا مش عارف مهمته ايه في الجهاز الفني – غير انه يتصور في التمرين و الجماهير تقول الله عليك يا حماصة يا قاهر الطليان

طيب خوان وحش … حمص و خضر بيعملوا ايه و ليه .. في حكاية اخر عشر دقائق دي و دونجا الوحيد اللي بيبقي ليه و بيعمل ايه و يخرج محمد عادل المقاتل و ننسي عماد حمدي مسمار الوسط … ليه ليه ليه

عموما انا لو مكان خوان و مجلس السيرك .. كنت عملت تمثال للكاميروني صامويل ايتو .. انه اعطاهم فرصة للحياة الي نهاية يناير 2021 .. لان الفريق لسه محتاج شغل كتير و كتير قوي قوي من ناحية التعاقدات و اسكمال النواقص و تجهيز اللاعبين … لسه كتير كتير قوي فعلا

صحيح الحكم محمد عادل عنده ضمير بعدد شعر راسه … و كان حيطير الماتش مننا و معاه جهاز الانس .. لا بيعترض و لا له صوت

ضربة جزاء يشوفها اللي ما بيشوفشي .. و محمد عادل عامل من بنها العسل الاسود و جهازنا الفني من طنطا و اتعلموا من الزنديق عبد الحفيظ يا عالم بلاش قعدتكم تماثيل و مسا التماسي يا صنم قاعدين علي الكراس

و الله يمسيك بالخير يا كابتن سعفان الصغير – كان بيتطرد علي سطر و يسيب سطر

لكن مع كل ده ما يمنعشي ان نسأل … هو الفوز حرام يا سيدنا الشيخ خوان

و انتهي الكلام خارج المقرر

Click to comment

Leave a Reply

لن يتم نشر عنوان بريدك الإلكتروني.

بقلم الدراويش