Connect with us

عيون إس سي

يا تري خوان براون … زعلان ليه

أخطر من القاء التهم بعد الانكسار … محاولة الاستيلاء علي تورتة الانتصار … وسرقة الكاميرا

ده لو اعتبرنا اننا انتصرنا من الاصل

لما الدنيا تبدأ تنور شوية ..بعد الظلام .. الكل عايز ياخد اللقطة ويقول بفضل توجيهات فلان و اوامر علان و احلام زرزان

وحنفية الشكر والتقدير والمحن والتهليل و التطبيل .. مفتوحة علي اخرها

و ا كأننا فتحنا عكا ومالقا وطليطلة وبلاد تركب الافيال

يا جماعة الخير ويا اصحاب الحنفية … فريق الاسماعيلي في خطر ومعرض للهبوط .. ولسه في خطر ومعرض للهبوط

وكل الهيصة اللي احنا فيها من تعاقدات بوليفية ولاتينية وجزائرية ومهلبية … لن تنفع ولن تشفع .. الا لو حصل استقرار وتخطيط وتنظيم علي اعلي مستوي

لكن اصحاب النرجسية وحنفية الشكر – مستعجلين وعايزين يقطفوا الثمار قبل اوانها ولو كانت حصرم ومره علقم

اصبروا يا بتوع الحنفية و الشكر والتقدير و لقسم بالله علي الفاضي والمليان .. اصبروا وابلعوا ريقكم شوية و فكروا كويس

كل الهيصة دي ممكن تروح علي فشوش وبكوش – لو ضاع الاستقرار والتخطيط السليم

فلاسفة الغبراء … شغالين تكسير في الامور اللي خرجت من سيطرتهم من البداية و منهم الجهاز الفني ورئيسه الارجنتيني خوان براون .. وكتبوا كلام فاسكوني وتحليلات بيزنطية و كلام كله غير عقلاني بالمرة علي الجهاز الفني

و سيوا ان الجهاز الفني بقيادة الارجنتيني خوان براون استلم فريق ميت … والان الفريق بيفوز ويهدف وكل خطوط الفريق بتتحرك في كل انحاء الملعب – تلاقي عبد الرحمن مجدي بيدافع واحمد مدبولي بيعمل تاكلينج في الدفاع و الاجناب بقت عال العال

كل ده مش مهم .. لازم تكسير المجاديف والعيب في الجهاز الفني واللي جابوه ….. وان سبب كل البلاوي هو الجهاز الفني …. وفاكرين فلاسفة الغبراء انهم الوحيدين اللي بيفهموا في بر مصر … وتسريبات علي قد ما تقدر لدرجة ان المترجم كمان – بقي سمسار … وهو اللي جاب المدرب واشتغل كمان مترجم فوق البيعة … كلام لا يمكن ان يدخل العقل

 لا فلاسفة الغبراء ايديهم طايلة و وصلوا الي رئيس النادي و نائية و طالبوا منهما التدخل لوقف سيل التعادلات و لازم المدير الفني – يلعب فلان و يركن فلان .. و كتبوا له لستة طويلة من الافتاءات الفنية المهلبية … المدير الفني زعل من القصة دي … لانه ارجنتيني و محترف و محترم و في الارجنتين لا يقابل رئيس النادي او حتي لا يعرف اسمه من الاصل – الارجنتيني لا يعرف تلك التدخلات علي الاطلاق .. علشان كده زهقان و مش متوقع و لا مستقر

و كمان عضو مجلس الادارة اللي خرج يقول علي الفيس بوك … ليعيد كلام الكومي بخصوص الثلاث مباريات من حقنا نمشي المدرب … عايزين المدرب المحترف يعرف الكلام ده و يزأقطط مثلا .. لازم يزعل و يقرف كمان

القصة لسه و الله مظلمة و مغشلقة كمان … و التعاقدات الجديدة مبشرة و فيها اسماء جيدة و مجتهدة و جعانين كورة .. لكن كل ده حيتنسف نسفا كاملا .. ان دخلنا في طريقة الناظر و خلف 1100 و سماعهم لكلام من حولهم : غير المدرب ..ده بيتألط عليك يا سعادة البيه … و اسال اللاعب فلان لو مش مصدقنا يا سعادة البيه و لايفات و افتاءات و كلام لا له لزمة و لا معني

و الله الاسماعيلي في خطر و في خطر شديد … لو كنتوا بتحبوا النادي– لو يعني … اصمتوا فترة لله … علشان نخرج من الازمة

بعد كده ..خدوا التورتة كلها … بس شوية صمت لصالح النادي .. اعملوا معروف

3 تعليقات

3 Comments

  1. اكرام نسيم

    31 يناير، 2022 at 10:32 م

    افضل واهم واخطر مقال لحضرتك يا دكتور في ادق توقيت يمر به النادي

  2. علي خاطر

    31 يناير، 2022 at 11:50 م

    لازم يكون في استقرار وبلاش كل من هب ودب يقول تصريحات كفاية النادي في مهب الريح
    احنا في المركز قبل الأخير
    ادعموا اللاعبين والجهاز الفني وكفايه فتاوي ارحمونا يامن تدعون حبكم الاسماعيلي

  3. مصطفي عبد المجيد

    1 فبراير، 2022 at 3:02 م

    اصبروا علي المدرب ..لسه ليتعرف علي الدوري المصري ..وخلص عرفه ..وجاب قماشة كويسة إن شاء الله لما يزيد انصهارهم حيبقوا حاجة ..النجاح الناس كلها فاهمة أنه مش نجاح للجهاز المعاون ولا المدرب الكوتش ..ولا الشلة المتكلمة..ولا لجنة الكرة ..بلاش تحزب ..كل واحد عمل دوره صح وخدم بإخلاص وتفاني ..لجنة الكرة درست النقص وقالت ووافقت ورشحت وتفاهمت مع المدرب ورئيس النادي.. ورئيس النادي لم يدخر جهدا وبذل أقصي ما يستطيع مشكور ووفر ..والمدرب اشتغل والجهاز المعاون أنار له الطريق واختصار له المشوار ..ليه بقي كل واحد عايز التورتة لوحده مش لما تيجي التورتة الأول ..انتم لسه الاخير والدور التاني صعب جدا ..واستعادة الثقة مش فسحة والمنشآت والفرق صعبة جدا ..تكاتفوا واعملوا واصبروا عشان ربنا يوفق

Leave a Reply

لن يتم نشر عنوان بريدك الإلكتروني.

بقلم الدراويش