Connect with us

كلام خارج المقرر

سمينا وعدينا وبنقطة الجيش .بالدوري بقينا

اه يا زمن … كنا منتظرين نقطة من طلائع الجيش .. علشان نقول :

 

الاسماعيلي العريق والعظيم ..نجح في البقاء في الدوري الممتاز

النادي الاسماعيلي العريق والكبير والذي تم اختياره ضمن افضل 11 نادي في مصر ليبدء في اول موسم للدوري العام موسم 1948/1949 وتفوق في الترتيب فوق اندية عريقة و كبيرة مثل الزمالك .. و اصبح اسم الفريق ( الكوماندوز ) في اول بطولة للدوري مع الكبار

الاسماعيلي العريق و الكبير ..من قدم اساطير كرة القدم في مصر و العالم العربي و افريقيا … جماهيره اطمئنت اخيرا ..انه سيبقي في الدوري

مش حنتكلم عن ماتش الاسماعيلي و طلائع الجيش و الذي انتهي سلبي لعبا و نتيجة و تغلب علي لاعبي الاسماعيلي القلق و الخوف و الرعب .. و اللاعبين و الجهاز الفني ..مش عايزين يغلبوا .. بس مش عايزين يتغلبوا

و النقطة هي المراد من رب العباد … علشان نبقي مع الكبار …. و علشان مفيش ايهاب تجارب و لا تصريحات حمد ابراهيم .. كان فيه هدوء نسبي و حالة من الترقب و القلق .. حتي نهاية المباراة … عايزين نطمئن اننا بعيد عن المظاليم

مع ان هناك اخطاء بالجملة من الجهاز الفني و لا تغييرات و تارك لاعب خارج المود هو محمد عادل و لاعب مكسر هو حسي السيد

ولكن الحمد لله .. سمينا وعدينا وبنقطة التعادل مع الجيش .. بقينا

وبيني وبينكم .. انا مش عارف النهار عدي ازاي .. وانا منتظر الماتش و منتظر اعرف نهايته وكأني مخلص مناقشة رسالة .. ومنتظر نتيجة المناقشة من طاقم تحكيم غلس وصدغ … والقصة كلها قلق وتعب و خوف

وعايزكم جميعا ..نقف صف واحد وندعي من قلوبنا وبصدق واخلاص علي كل من أضر بالاسماعيلي وتاريخه العظيم

ونقول الله يسد بيتك باسمنت مسلح ويشردك في كل مكان .. من قامك بالكذب و الفشل و الخداع والتدمير في النادي .. وكل من بحث عن انه يكسب جنيه واحد من الاسماعيلي او حتي فكر يعمل مصلحة ويقبض فلوس بالحرام من النادي الاسماعيلي

الواحد من شدة الاعصاب .. مش عارف يقول ايه … لكن لا ده شكل الاسماعيلي ولا ده لعبه و لا ده مستواه

في موسم 1978/1979 ؟؟ صادفنا نفس الموقف وكاد الاسماعيلي يهبط و نجا من الهبوط بالفوز علي المقاولون العرب  4-0 و ضمنا البقاء في الممتاز

كان تشكيل الإسماعيلي مكون من أبو ليلة وإبراهيم ادهم و مكاوي ومحمد توتو واشرف صابر وعماد سليمان ومحمد حازم وأبو بكر غازي وعلي أبو جريشة وأسامة خليل

وفي الخارج خالد القماش وحسن درويش غمر وطارق زين وحمادة المصري وحسن مبارك وإبراهيم خليفة وجمعة حسين وجمال عبد الحق

شوفوا كمية النجوم كانت بالفريق ازاي وكباتن منتخب مصر وهدافين الدوري مين في الاسماء دي

كان الضرر من المدير الفني للفريق و شكل ادارة الفريق و النادي كانوا في ضياع الضياع .. مدرب الفريق قاعد معظم الوقت في انجلترا و مساعد المدرب اخدوه يدرب مساعد مدرب منتخب مصر و الفريق كان بيتدرب بدون مدرب و تركوا الاسماعيلي يلعب اسوء موسم له …و ربنا سترها معانا في النهاية

لكن بالموسم الحالي و من بدايته . لا مدرب ولا لاعبين ولا ادارة .. كله كان خلف في خلف

وكانت النتيجة زي ما كلنا تابعنا وشوفنا .. ايه اللي حصل طوال الموسم … لا كلام يمكن وصفه و لا تعابير تحتويه

قصة تحتاج هيتشكوك يخرجها صح ومعاه الادوات .. رئيس مدمر دراكولي و مستشارين شياطين واعضاء سلاحف النينجا وحتي محاميهم بتاع الفيفا .. شغال في الاونطة .. ويحلف انه في الاسكندرية ..مع انه في طنطا

والكل اتكشف النهاردة وكله ..صدق النهاردة ان الـ 3 نقاط مخصومين .. وحتي اللي بيقول الخصم مش حيقع .. كان منتظر صفارة محمد الحنفي .. علشان يقول ..النقطة حلوة حلوة يا اولاد الحلال

الاسماعيلي النهاردة وصل للنقطة 38 وبالخصم 35 .. ولا نملك الا ان نقول

اللهم لا تعيدها ايان علينا و ابعد عننا الناظر و اتباعه

قولوا امين

وانتهي الكلام خارج المقرر

Click to comment

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *

بقلم الدراويش