Connect with us

عيون إس سي

علي فكرة انت بتشجع الاسماعيلي ..مش نادي أم سحلول

لكل من يتحدث عن المال ..المال ..المال … اقرء معي و حاوا ان تفهم معي ما اقصده
الاندية الكبري و الاندية الثرية ..بتبحث عن 2 متر مربع ..تعمل فيه كشك .. و تأجره و تكسب من وراه مال
الاهلي و الزمالك و بيراميدز و كل الاندية اصحاب المال .. بتعمل المستحيل من اجل تنمية مواردها حتي لو بخمسة الاف جنيه …زيادة سنويا .. و بتمص جيوب اعضاء النادي و مشجعية من اجل تنمية موارها المالية بصورة حضارية جميلة
لكن في الاسماعيلي .. بعض جماهيرنا … بتموت في الشحاتة و النحاتة و الوقوف علي الابوب من اجل التسول
ليه مش عارف
مع ان الدولة .. ايوة الدولة .. وقفت بجانب الاسماعيلي .. كما لم تقف مع نادي مصري غيره علي الاطلاق
الدولة المصرية … منحت للنادي الاسماعيلي ارض قيمتها 3 مليار جنيه و قامت ببناء النادي مجانا و لم يتكلف الاسماعيلي مليم احمر كمان و ارض مساحتها 27 فدان بالتمام و الكمال
27 فدان ..مش 2 متر مربع .. محيط من الشغل و العمل و التخطيط و التنفيذ
الاندية الكبري كانت بتاخد اراضي خارج العمران و قبل ما يزحف اليها البناء
لكن الدولة اعطت الاسماعيلي ارض النخيل في وسط البلد و وسط العمران
عملت ايه مجالس ادارة النادي … عملت الشوم و كلام البوم
و لا كأن النادي يخصها من قريب او من بعيد
فاكرين تقرير للعبد لله كان بعنوان
لو كان نادي ( أم سحلول ) لأنتهي من نادي النخيل
التقرير ده من 3 يونيو 2014
فعلا لو كان نادي ام سحلول و مجلس اداراته مجموعة من السحاليل .. كان الوضع غير الوضع
عارفين النادي الاجتماعي في ارض النخيل عملت فيه ايه مجلس المغارة و ما عملتش ايه مجلس السلاحف …
مجلس المغارة اعتبها منظرة و هنكرة و لعب سبوبة و مصالح
فاكرين الاعلان الوهمي اللي نزل عن المشروع من اجل السبوبة والسرقة و تنظيمها
و عملوها الحرامية و شيخ المنصر … علشان يسلوقوها و يحمروها و يشفوها .. و يبلعوها … هيلا بيلا
فاكرين الاعلان ده كان سبب تأخير النادي الاجتماعي قد ايه
سنة كاملة .. بسبب واحد حب يضرب ضربة عمره
و اللنك اهو
كان اعلان فضيحة .. تكشف ان الاسماعيلي ده اغلب من الغلب . و ما لوش صاحب و لا قريب و لا حبيب
و الله.. لو مجموعة سحاليل ..كانوا خلصوا النادي الاجتماعي و افتتحوه
ليجيء بعده ..مجلس السلاحف .. و رئيسه و مناخيره في السما و ألاطه و عنجهية و فشخرة و قنعرة .. او أي شئ علي وزن فعللة
المحصلة صفر في صفر في صفر
مجالس ادارات تتبع قانون : جوع كلبك ..يتبعك
ده فكرهم ..مش فكرنا و دي نظرتهم مش نظرتنا
و من غير الكلب ما يكون جعان ..مش حيمشي وراء صاحبه علشان المًمْ
لو الكلب اتعشي .. حيسيب صاحبه يلعب بعيد عنه .. و يمكن يتوه كمان و يدور علي بنت الحلال كمان
لكن الكلب لازم يفضل جعان و محتاج .. علشان يستني سيده و يهز له ديله
كل ما سبق … و اكتر و اكتر و اكتر
سبب ثقافة كنغرية سفسطائية غريبة … فين الفلوس فين الفلوس
ادونا العادة .. الله يخليكم
و خلوا معظم الجماهير … تتفلسف و تتقنعر … فين الموني مستر جوني ..جبف مي وان سيجاريت اند وان افريكان بلاير ..بيليييز
الاسماعيلي العظيم العريق الكبير .. جوهرة الاندية المصرية بلا منازع
عايز ثورة في التفكير و قبلها ثورة في التعبير
و بلاش نتولد و احنا ايدينا ممدوة .. لغير الله تعالي
نجرب نشتغل و نجتهد و نعمل بجد و علم … بلاش نشحت و نشوه نادينا الوطني الاول في مصر
امجاد و امجاد … بناها الاجداد بقرش فوق قرش
بناه الاجداد و هما قاعدين علي القهوة في الثلاثيني مش في الفور سيزون
لانهم كانوا رجالة و وقفوا وقفة رجالة بصوت المليجي
بلاش شحاتة و نحاتة من شخصيات عارفين كويس انها حترمي لنا بريزة علي الارض .. و نوطي نجيبها .. و حتضربنا بالشلوت … و تفضحنا امام اللي يسوي و اللي ما يسواش
فكروا في التقرير المكتوب من 7 سنين و زيادة
لو كان نادي ( أم سحلول ) لأنتهي من نادي النخيل
و نسأل نفسنا … هو احنا عملنا ايه … علشان الاسماعيلي
الاسماعيلي العريق و الكبير .. مش بالكلام و لكن بالفعل

Click to comment

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *

بقلم الدراويش