Connect with us

كلام خارج المقرر

روح الناظر والسلاحف علي الدكة في استاد برج العرب

الاول كل سنة والجميع بخير و سعادة مع الكلام خارج المقرر … وكان نفسي اقولها و احنا فايزين ومبسوطين,, مش واحنا حزاني وحزنانيين 

لكن ازاي نفوز ونفرح .. وحال النادي لسه مغروس في الطين مع الناظر مجلس السلاحف الغير مأسوف عليه ولا علي رئيسه 

أيوة اتغلبنا 4-0 من الاهلي في اول مباراة … والمر والعلقم مالي القلب قبل الفم … لكن لازم نتكلم ونفضفض بكلام خارج المقرر 

خلينا نركز في لقطة واحدة … لقطة ضربة الجزاء في الدقيقة 19 .. يعني كان لسه الكل فريش في فرافيش

الحكم محمد عادل حسبها وهو غلطان ومش عادل … ماشي 

ركز بقي علي الجهاز الفني للاسماعيلي .. الكابتن محمد ابراهيم و الكابتن محمد حمص و الكابتن محمد صلاح ابو جريشة

عملوا من بنها ………… هوووووووس بسسسسسسسسسسس .. و لا كأن الامر يعنيهم خالص 

 لا اعتراض ولا زعلوا ولااتحركوا …. ولا لهم عينين من الاصل علشان يوروا الحكم الغير عادل,,,  العين الحمرا 

بلغة الكورة والملعب ..كان لازم الحكم المهزوز ده يشوف العين الحمراء من الجهاز الفني حتي لو توقف اللعب و خدنا انذارات او طرد … لكن الاخوة السلاحف  القطاقيط سابوا الحكم .. يعمل اللي هو عايزه .. واحتسب الهدف التاني من اوفاسايد .. ومن بعده الماتش فلت وضاع وضاع 

خلاصة الكلام مفيش … روح في اللاعبين ولا الجهاز الفني ولا حتي مدير الكرة

وحتي لما اللاعب المصارع ضرب الشامي وسال دمه واتقطعت فانلته … القطاقيط ..كانوا كيوت خالص 

وقاعدين في زمان ومكان تاني خالص  

والكابتن حمص والكابتن ابو جريشة من زمان ولا لهم صوت .. لكن الوضع في الجهاز الفني يختلف .. لازم لامؤاخذة تبقي قليل الادب وتفرض شخصيتك وحماسك يوصل الملعب .. لكن تقعد سلاحف … ايه كانت النتيجة 

لا فيه روح من اللاعبين ولا الجهاز الفني ولا اي شئ .. وهما داخلين الماتش من اجل اقل الخسائر الممكنة ..من ساعة ما خرجوا من الاسماعيلية 

وكانت النتيجة 4-0 .. في توديع الناظر ومجلسه السلاحف واللي نقلوا السحلفة الي دكة الاحتياط و لجهاز الفني

ايه يا كلام خارج المقرر …. هو كل حاجة تجيبها للناظر… الناظر… هو مفيش غير الناظر 

مش الناظر مشي يا عمنا .. و الراجل كافي خيره شره

حاقول لك …  لا يا عمنا … الناظر طيب الله ثراه .. عملها صح الصح .. علشان اللعنات تفضل معاه الي يوم الدين 

الناظر قعد في المزرعة من يناير بالامر … يبقي لو كان ناوي علي خير كان بحث عن اقرب وقت يرحل فيه عن النادي .. يعني كان عمل الانتخابات في شهر اغسطس وترك مسئولية الموسم الجديد لمجلس الادارة الجديد 

 لكن الناظر الشرير .. عمل الانتخابات في 31  اكتوبر … اخر يوم في فترة عمل الانتخابات ولو كان هناك 32 اكتوبر كان عملها … ليه ؟ 

 علشان الناظر يعدي فترة القيد علي المجلس الجديد و يدخل في الموسم الجديد ويفضل كاتم علي نفس النادي وكاتم علي نفس الجماهير ..حتي اخر يوم ممكن في حياة مجلسه البغيض .. يمكن بيرزنتيشن تبعد شوية ملايين .. يقشهم و يضربهم في جيبه 

المجلس المأفون .. مفيش واحد دخل النادي من اول اغسطس الماضي … ولا واحد منه .. حتي القصير المكير …. اشتري دماغه وراح سهل حشيش .. يحش هناك 

والناظر طلع عين ام اللجنة الفنية وقطع ايديها وصوابعها … وخلى ايدين الهر والعمدة الاتنين شمال … وعايزين يروحوا يمين .. يروحوا شمال … والناظر جاب الهس هس للجميع 

كانت النتيجة كلها اللي شفناها … ولسه حنشوفها وربنا يسترها معانا 

ومش ممكن خمس سنوات زي الطين المطين بطين … حنلاقي- بعدها – الارض مفروشة حرير في حرير … ويتحول دونجا و شيلونجو وشكري الي مارداونا وميسي ومو صلاح.. لسه عايزين انقلاب بمعني الكلمة  

مع ذلك .. هناك دروس يمكن نستفيد من الليلة السودة دي … المجلس الجديد لازم يكون شديد وقوي وصوته عالي….مش مجلس عبيط بهلول فاشل … عايزين ثورة في كل شئ .. من الالف الي الياء.. لازم مجلس يعرف يعاقب ويزعق ويشخط في اطخن طخين .. عايزين مجلس يحمس اللاعبين و جهاز فني شديد .. مش مجلس ساذج … يقول لو فازوا علي الاهلي حاجيب لكل لاعب عجلة و مصاصة ولهم مني بقشيش  و اللي يجيب جول حياخد الفين عفريت .. عفريت يلم العفش 

الاعداد النفسي شئ مفتقده النادي و الفريق من خمس سنوات في ضياع الضياع.عايزين مجلس يعرف اللاعبين قيمة الفانلة الصفراء واللي مش قدها ما يلبسهاش .. ثورة يعني ثورة من الباب الي الشباك من فوق لتحت .. و من تحت لفوق

غير كده حنطلع من لناظر … حنقع في الف دحديرة   

واسف للنرفزة و العصبية .. لكن كلنا حالنا .. فعلا  يصعب علي الناظر 

وانتهي الكلام خارج المقرر 

3 تعليقات

3 Comments

  1. Darawish2002

    28 أكتوبر، 2021 at 12:37 ص

    كلام سليم نتيجة طبيعية لسنوات من الجهل والفشل ازاي نتوقع حاجة تانية

  2. Darawish2002

    28 أكتوبر، 2021 at 12:48 ص

    عايز تتقهر بجد عماد متعب الاهلاوي شخص المرض بدقة وحسني لأ
    متعب قال اللعيبة متوسطة مش على مستوى الاسماعيلي وحسني الل ف قلب الموضوع يقولك طريقة اللعب الدفاعية والاهلي موفق في ايه ياعم حسني
    وحمص بدل مايعتذر للجمهور حتى طال يقولك ماتش وعدى دول 3 نقاط
    ياناس الاسماعيلي بقاله 11 سنة مش عارف يكسب الاهلى ولا ماتش ماتش واحد بالحظ حتى
    ميدو قال قبل كده ان الاسماعيلي هويته اتمسحت
    رضا عبد العال قال الاسماعيلي كان فريق كبير دلوقت ماشي على خطى الترسانة
    للاسف الواحد مش متفائل اطلاقا

  3. ايمن الاسماعيلاوى

    28 أكتوبر، 2021 at 10:12 ص

    مين العبقرى الذى يشرك لاعب ناشيء جديد على الفريق فى مباراه قويه وألنتيجه انه كان ثغره واضحه فى الجهه اليمنى
    متى نتخلص من الشامى ودونجا حتى نعرف طعم الانتصارات

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *

بقلم الدراويش