Connect with us

أخبار الدراويش

العمى أرحم بكتير .. يا شوية طراطير

عارفين ان مجلس النأظر وسلاحفه الغير مأسوف عليهم .. تركوا الارض محروقة 

عارفين ان اللجنة الفنية.. اشتغلت وطبخت وغرفت … والكهرباء مقطوعة وحولها الدنيا سواد  

عارفين ان الرئيس الجديد الكومي … جه يكحلها عماها و خلاها ضبش في 24 ساعة و خلال خل كمان 

عارفين ان اللاعبين مش عارفين كوعهم من بوعهم … ومين حيكون الكوتش

عارفين ان المدرب العام محمد ابراهيم كمان لا طعم و لا رائحة و لا حاجة من الاصل 

 لكن في نهاية الامر دي كرة قدم و امكانيات فنية و مهارية داخل المستطيل الاخضر و مش ممكن الهزيمة التالتة و فعلا 

 العمى ارحم بكتير … يا شوية لاعيبه طراطير

و عارفين ان ما لكمشي ذنب .. و ان اللي اختاركم خلف و خلفكش و الناظر و عصابته … لكن انت لاعب كرة قدم  و ده المفروض يعني  وبتاخدوا ملايين ..  لكن و لا فيكم لاعب يساوي تلاتة مليم 

 الاسماعيلي العريق و الكبير  شارك في مسابقة الدوري العام من موسم 1948/1949  و ترك علامات خرافية من الموسم الاول و حاز علي المركز الثالث  بعدما تساوي مع الترسانة في عدد النقاط و احتل الفريقان المركز الثاني و لعبا مباراة فاصلةو خسر الاسماعيلي  بمؤامرة و سوء تنظيم بنتيجة 3-2 .. و من يومها و الاسماعيلي هو عفريت و بعبع كل الاندية و تاريخ عظيم و انجازات و لاعبين مهرة سحرة 

 كل ده اضاعه شوية متسلقين و رجال اعمال فاشلين واخرها .. نتغلب 3 مباريات ورا بعض في بداية الدوري في حدث لم يحدث من قبل .. يا شوية لاعبين شخاليل وطراطير 

 لا نقل كورة ولا صناعة فرص ولا تحرك خططي و حتي الامكانيات من نوعية الشامي و شيلونجو ودونجا وشارك في الثلاث مباريات 24  لاعب..كلهم اسوء من بعض واساءوا لبعض  ولا فيهم لاعب يمكن تقول عليه عنده ضمير 

 مهما كانت الظروف و الشخبطة و اللخبطة اللي عاشها الفريق خلال الثمانية واربعين ساعة قبل المباراة .. هناك فارق بين لاعب يريد الفوز ويعرف واجبات مركزه وبين لاعب مش عارف الفرق بين اسكندرية و اسوان

 محمد فوزي الحارس البديل انقذ جماهير النادي من هزيمة بفضيحة و شال 3 اهداف محققة د 48 و 88 و 92  و السؤال هنا هو الاخ محمد صلاح ابو جريشة و الاخ حمص … مش شايفين مستوي الحارس الاساسي احمد عادل عبد المنعم … طيب ساكتين ليه

الاخ محمد مخلوف ..ازاي يشارك اساسي ويقعد ثم يعود اساسي ليه … ايه يا عم حمص .. فيه ايه 

الكلام عن الماتش يجيب الهم والغم والحزن وحرقة اعصاب .. واهو ماتش عدى و فات 

 نيجي بقي لاخواتنا الحلوين .. اللي كانوا في المقصورة مجعوصين ومنورين 

ولاد بلد بحق وحقيق ..نظارتين شمس واتنين نظر .. والطيب من غير نظارة 

 

 ونخدهم من الشمال الي اليمين … الكابتن خالد الطيب و المهندس محمد ابو العلا و الاستاذ عاطف زايد و الاستاذ حاتم حجازي و المهندس خالد زين

من اولها كده .. مش عايزين نشوف وشكم و لا طلعتكم البهية في التلفزيون لا ارضي و لا فضائي .. ولا وش ولا طة الكومي البهية  في اي برنامج  علي الاطلاق

 اقفلوا علي نفسكم  كويس واجتمعوا كويس واشتغلوا كويس و خدوا قرارات عاقلة و متزنة و حاسمة و قوية … انا عارف انكم قدها و قدود و رجالة بحق و حقيق و كل واحد منكم يقدر يدير نادي لوحده  و دي مش مجاملة  … لكن لازم تقفلوا علي نفسكم و تتناقشوا للصالح العام و مصلحة الفريق

امنعوا الكومي يخرج في الفضائيات وبلا هرتلة وشغل صهللة ومرة واحدة تكفي و كفاية احلام و اوهام الاستثمار و العفاريت الزرق و زمان كان تشيلسي العرب ..دول حنبفي باريس سان جيرمان القناة … و حياة ابوكم .. عايزين شغل علي الارض و تنفيذ فوري .. لان الحالة مش عايزة فتاوي و احلام واوهام و ضحك علي الدقون

وكفاية مغازلة مشاعر الجماهير في وقت مش مناسب و مش كل حاجة عايزها الجمهور ..تنفذوها… لازم يكون فلترة لعملية مغازلة الجماهير … الجمهور عمرة ما كان مقياس و لا بوصلة اختيارات .. حتلاقي من الجمهور عشرة عايزين المدرب فلان و عشرة عايزين  مدير كرة الكابتن علان .. و حتلاقي العشرة الاولي مش عايزين فلان مدير كرة و العشرة التانيين مش عايزين الكابتن فلان مدرب .. يعني القرارات الفنية لازم تكون فنية و خاضعة للدراسة و التحقيق بواسطة خبراء .. مش مجرد اللي يقول : بحبك يا كومي … ياخد وظيفة علي الفور 

 يا ولاد البلد : زين و الطيب و زايد و حجازي و ابو العلا …. الحمل عليكم انتم و القرار بأيدكم انتم 

 كفاية كده قوي ولو حتي 48 ساعة لخبطة و شخبطة  .. و انتم مجلس محترم كاشخاص .. عايزين نتيجة خلال فترة التوقف 

و كل اللي بيحدث  في الاسماعيلي كان بسبب سلاحف خرساء عمياء صماء مع الناظر .. انتم ما شاء الله .. رجال و اثبتوا انكم رجالة و معاكم كمان نانسي القاضي … رجل تمام 

و نعتبرها بداية جديدة … و انقذونا  من ما نحن فيه

لا تجيبوا مدرب من خلالكم و لا من ارائكم .. اختاروا لجنة فنية تختار 

و لجنة فنية تكون عاقلة  مش منافقة من اولها

عايزين لجنة فنية كورجية

و يسترها معانا الله تعالي … يا قادر يا كريم 

و انتهى الكلام خارج المقرر

May be an image of 9 people, beard and people standing

 

 

2 تعليقان

2 Comments

  1. ايمن الاسماعيلاوى

    4 نوفمبر، 2021 at 6:50 م

    بلاش تجارب جديده ويجيبوا حمزه الجمل
    لازم مدرب اجنبي قدير المدربين الوطنيين المحترمين مش فاضيين
    حمزه الجمل لن يكون أفضل من العيسوى او العجوز او خضر

  2. ايمن الاسماعيلاوى

    4 نوفمبر، 2021 at 7:51 م

    هل رأى احد مستوى محمد مجدى مع المقاصه
    افضل آلاف المرات من أحمد عادل المهزوز بشده

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *

بقلم الدراويش