Connect with us

كلام خارج المقرر

من أولها يا يناير .. يا تغور يا مجلس الكومي

لو لعبنا عشرين مباراة ودخل مليون مشجع ولعبنا في قلب العرايشية او المحطة الجديدة او حتي في المريخ .. وهجوم الاسماعيلي بالشكل ده … ولا حنفوز و لا حنتعادل 

ليه 

 لاننا بنلعب من غير خط هجوم علي الاطلاق .. و ده مش من الموسم ده ..ده من 3 او 4 مواسم .. و الكل بيخبط  و بيشخبط

و ارجعوا الي الحسابات الرقمية في كل المواسم السابقة ستجدوا ان الاسماعيلي فريق ضائع ضائع ضائع ضائع تهديفيا .. مش عايزه كلام و لا فلسفة   .. و حتي لما جابوا التونسي فحر الدين بن يوسف .. مفيش ثبات و لا فكر تعاقدي .. ولكن الكومي حب يغازل الجيوب .. جاب شونجا و هونجا وبونجا الطفشان 

 مشكل الاسماعيلي كلها في رؤوس الحربة وتحت الهدافين من سنوات .. ومجلس السلاحف زود الطين بلة  والمجلس الحالي و اه من المجلس الحالي برئاسة المهندس يحيي الكومي وحنتكلم عليه بعد قليل مع ان عارف البهاليل .. جاهزين للرد والتبرير والتنميل والشخلخلة ..  لكن حنتكلم بالعقل و التحليل و لو انه كلام خارج المقرر

بس خلونا نركز مع طريقة الاداء الهجومي  من خلال امكانيات الهجوموميين بتوعنا … اللاعب شكري نجيب استلم الكرة 9 مرات وسط ضغط دفاعي و خلصها مرة واحدة فقط .. و الثمان مرات ..ما حدش عارف هو عايز ليه او بيعمل ايه و وفيه ايه و لا بتدرب علي ايه … و بالتالي الزمالك بيسترد الكره و يبدأ التحضير من وسط ملعبه و لولا فدائية المحترم عماد حمدي اليوم .. كان حيكون هناك بلاوي و كوارث علي الدفاع

 الاخ الشهيد طيب الله ثراه  شيلونجو … و لا في الطراوة خالص 13 استلام تحت ضغط دفاعي و مرتين فقط  تمرير صحيح و الباقي تشعر ان شيلنوجو  مولود في ميت عقبة  و اسمه شيلونجو عبده نصحي .. و زملكاوي اصيل لابس ابيض في ابيض.. وارجعوا الي أنفراد شيلونجو  بمحمد عواد بالدقيقة 34 … قارنوه مع  انفرد عمر السعيد بمحمد فوزي د 93.. حتلاقوا الفرق بين  الغباء و الزكاء ..و لولا عبد الرحمن مجدي .. كان لعب الاسماعيلي 96 دقيقة في نصف ملعبه و الزمالك مهاجم و تضاعفت اضعاف النتيجة و يكفي ان نقول ان الزمالك حص علي فرصتين منهم ضربة جزاء .. و سجل هدفين .. بينما الاسماعيلي كان له 4 فرص ..المحصلة صفر 

الاسماعيلي يعاني تهديفيا و هجوميا من سنوات و سنوات … و المجلس الحالي برئاسة المهندس يحيي الكومي يعلم ذلك ( و لو اني اشك في ذلك ) … و لو لم يتم تدعيم الهجوم برأسي حربة سوبر السوبر … و تحت الهدافين .. و يريحونا من شيلونجو و شكري ..شوية …  يبقي المجلس كله يغور و مع السلامة … برضه ليه

لأن شواهد الاسبوع الماضي .. فيه دلالات مباشرة و واضحة جدا جدا .. و يفهمها من لديه عقل .. اما من يغلق عينيه و يعاند .. يخليه علي جنب شوية 

اللي حصل بالاسبوع الماضي و بتصريحات من السيد رئيس النادي الاسماعيلي المهندس يحيي الكومي .. توضح ان مفيش فلوس.. حتدفع من ماله الخاص  لحل ازمات الخزينة الخاوية يمكن يدفع شهر و الا اتنين للموظفين ( و حأستردهم ) … ده اللي قاله المهندس الكومي بنفسه  صراحة و ليس تلميحا … و لا يوجد اموال ستدخل لخزينة قبل يناير  من الشركة الراعية اللي ضحكت علي المجلس بقوة … يعني بالعربي الصريح و المليح مفيش تدعيمات ذات قيمة في يناير و حيروحوا للحاجة ام بلاش كده .. و حيبقي الحال اسوء من ما كان عليه و اسوء من الموسم الماضي … يبقي من قصيرها كده .. المجلس اولاد البلد و بنت البلد … لو وافقوا علي  كده من المهندس الكومي .. يبقوا  يورونا عرض اكتافهم قبل يناير

 لان لو الكومي مش حيحل الازمة قبل يناير .. تأكدوا المجلس كله حيمشي في فبراير .. يا حلوين يا طعمين .. لان الجماهير رجعت المدرجات و مش حنتغلب علي أرضنا زي الموسم اللي فات … و الجماهير مش حتصبر  علي  النسخة التانية من مجلس السلاحف

 يعني مجلس الادارة ولاد البلد  الحلوين … يضعوا خطة شاملة كل شئ و من اجل يناير … و بصراحة كده احنا لا ضامنين نغلب المقاولون و لا  غزل المحلة بشلة  المساخيط في الهجوم  

و كمان الاخوة في اللجنة الفنية … الكابتن حمادة المصري و محمود حسن و اشرف خضر.. يكونوا اشتغلوا قبل ما اتعينوا .. و يحددوا احنا عايزين ايه و يعلنوها صريحة و واضحة .. حتشتغلوا بما يرضي الله  من اولها  و الا حسب تعليمات الباشمهندس .. و الا انتوا كمان تورونا عرض اكتفاكم .. مش حننتظر محمد خلف في تلاتة ..مش ناقصاكم بجد

 صحيح … المجلس الحالي مالوش ذنب في الفريق و تشكيله … و مجلس السلاحف و رئيسه  ترك الارض محروقة و مسرطنة … لكن الوقت مش وقت حساب و لا جعرافيا … يناير القادم هو الفيصل  – مش للحكم علي المجلس الحالي و الكومي دي اخر حاجة ممكن نفكر فيها  .. لكن من اجل البقاء في دوري الاضواء و عدم الهبوط الي المظاليم

القصة مش محتاجة مزايدة من البهاليل و لا عشاق المال و اصحابه ..احنا امام كارثة حقيقية … بالموسم الحالي … و ان كانت كارثة بالموسم الماضي و جاءت متخفية و واحدة واحدة كشفت الكارثة عن وجهها القبيح … لكن الكارثة بالموسم ده ..واضحة و صريحة و من اليوم الاول بالموسم .. و دخلنا في الفضائيات و الصوابع الاثنين و تهديد لاعبين و مكافاءات عبيطة من محبي الظهور  من اهل السياسة كمان … الكارثة الموسم ده دوبل و واضحة و مع ذلك … الحمد لله … انها كشفت عن نفسها مبكرا … و علشان كده قلنا في البداية و من أولها :    يا تدعيمات قوية و مؤثرة في يناير القادم ..يا يسيبوا مكانهم في قبل يناير

و من الطبيعي انك ستجد من يقول هذا هجوم مبكر علي مجلس المهندس يحيي الكومي و حاصة ان كاتب المقال لم يكن من من انتخبوه في الانتخابات و هو قول بشكل عام غير موضوعي علي الاطلاق .. لان ما يكتب هنا لا علاقة له بتخليص فواتير انتخابات و من مع ..  و من ضد …  لان مصلحة النادي و الفريق فوق كل اعتبار و كما قلنا ان يناير هي مسئولية المجلس الحالي و ليس ما سبقه .. لان رئيس المجلس السابق المهندس ابراهيم عثمان .. لم يشأ ان يترك منصبه الا في اخر يوم من فترة ولايته في 31 اكتوبر و لو كان هناك 32 اكتوبر .لكان فعلها بكل فجور  و فعل ذلك عامدا متعمدا  ان يمرر فترة القيد في عهده الميمون .. حتي يدمر كل شئ  يمكن تدميره و لا يترك لنا الا مجلس من اختياره و يتركو ليفشل … و هل مجلس الكومي قادر علي التحدي و اصلاح الامور .. بكل اختصار … يناير هي المحك و هي الاختبار .. يا يفلحوا .. يا يرحلوا    

و انتهي الكلام خارج المقرر 

Click to comment

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *

بقلم الدراويش