Connect with us

وثائق ودراسات الدراويش

فتوة الغلابه راجع ان شاء الله

بقلم محمد مندور عن الدراويش :
في حب الدراويش

اى حد من برة اسكندرية يسألك بتشجع نادي إيه فتقوله الإتحاد يقولك ايوه ومين معاه بأه؟ اللي هو يعني انت اهلاوي ولا زملكاوي مع الاتحاد ومهما تحاول تفهم فيه انك اتحاداوى بس مبيفهمش!

بس الحقيقة انا كاتحاداوي مبحبش غير الاتحاد، وبعد منه نادي تاني، لا هو اهلي ولا الزمالك!

انا بعد الاتحاد بحب الاسماعيلي جدا، لا مش بحب الاسماعيلي، انا بعشق الإسماعيل، بتمتع بكورته وبحب لعيبته ونجومه، بحس اني بتفرج وانا بسمع السمسمية، وبتمشى علي شط القناة.
وفي بطولات افريقيا اللي خاضها الإسماعيلي وكان قريب منها جدا لولا متش انيمبا النهائي وتعنت الدهشوري حرب ومحاربته لنادي بيمثل الأمل والحلم لكل اهل المحافظات، بكيت علي ضياع البطولة والحلم اللي كان قريب، ويوم متش الاتحاد وغزل السويس كنت بتفرج ع الاسماعيلي والمصري في نهائي اخر دوري فاز بيه الدراويش وبودني بسمع الاتحاد اللي لولا المتش ده كان هبط والاسماعيلي وقتها فاز بالدوري مع محسن صالح، اقسم بالله كنت بدعي ربنا واقوله متخايش فرحتي ناقصة، الاتحاد يقعد والاسماعيلي يبقي البطل ، عمري ما اتمنيت في حياتي الاتحاد يخسر ادام اي حد الا الاسماعيلي لما كان بينافس علي الدوري

الاسماعيلي بيمثل ليا ولكتير من جماهير المحافظات حاجة كدة زى (فتوة الناس الغلابة) أو (روبين هود) او (أدهم الشرقاوي) اللي بياخد من الكبار وبيدوا الفقرا، بطل او فتوة بيقف بنبوت خشب ويحارب بيه مدافع ودبابات، احيانا بيصمد ويكافح واحيانا بينهار ، لكنه قبل ما ينهار بيكون كل اللي قبل منه انهاروا، الاسماعيلي هو حائط الدفاع الاخير والدائم عن مدينتين فيهم ناديين شعبيتهم ممكن تكون اكبر من الاسماعيلي بفعل التعداد السكاني ليهم، لكن صمودهم امام الكبار بينهار بسرعة عكس الاسماعيلي اللي دايما بيحاول للنفس الأخير، اى نعم بطولاته قليلة عكس ما هو المفروض انه يكون، لكنها مهمة في ظل وجود جبابرة مسيطرين علي كل حاجة
الاسماعيلي هو اخر امل ونفس للصمود ادام قوة الاهلي والزمالك، الاسماعيلي هو قبلة الحياة اللي بتحيي اجساد بينها وبين الموت خطوة، الاسماعيلي هو اكتر نادي جماهيري اتحارب في مصر وتم تفريغ نجومه بالغصب او بالرضا بسبب الضعف المالي وضيق ذات اليد لمحافظة المفروض تكون غنية وتساعد النادي علي النهوض

لو يعرف لاعبي الاسماعيلي هما بيمثلوا ايه لكل اندية الاقاليم حيلعبوا برجولة اكتر من كدة، ويحققوا بطولة مهمة متتحسبش ليهم بس كأهل الاسماعيليه
لا تتحسب لكل مظاليم الأقاليم

Click to comment

Leave a Reply

لن يتم نشر عنوان بريدك الإلكتروني. الحقول الإلزامية مشار إليها بـ *

بقلم الدراويش